Паркларга кириш нега пулли? Жазирама ёз кунлари шаҳар аҳли сайр қилишни, пиёда юришни истайди? Шундай жойлардан бири парк ва хиёбонлардир. Лекин кейинги вақтда пойтахтдаги паркларга кириш пулли бўлиб бормоқда. Яна айнан дам олиш кунлари кириш ҳақи 2 баробар ошириб қўйилади. Шу ўринда савол: Қайси қонуний асосларга кўра жамоатчилик жойи ҳисобланган парклар ва хиёбонларга кириш пулли? Айтишингиз мумкин хусусий бўлса пуллик бўладида деб. Ўзбекистонда хусусий парклар йўқ. Паркларни бошқарадиган хусусий операторлар бор. Хусусий операторлар фақат кўрсатилган хизмат учун пул ундиришга ҳақли, паркка кириш учун эмас. Парклар давлат ва халқ мулки. Саволим доимгидек, ҳукуматнинг дастёрига айланган Параламентга, айниқса ҳукумат билан чатишиб кетган юқори палата - Сенатга эмас. Саволим Сайланган Мустақил депутатлар ва фаол жамоатчиликка. Тошкентнинг энг йирик паркларидан бири Ғафур Ғулом боғи ҳозир ёпиқ. Қанақадир чўнтак сингапурликка тортиқ қилинган. Бобур боғи ёпиқ, атрофи бўйлаб дом қурилаяпти. Ашхобод паркининг бир четига ҳам Mimar Group (номи танишдур?) қурилишни бошлаб юборган. Миллий боғнинг бир қисми эгаллаб олиниб, бетон ва пластмассадан алламбало примитив нусхаларни, ўзларининг примитив олиб-сотар дунёқарашларига мослаб, бунёд этишди. Катта эҳтимол билан бу жойга кириш ҳам пуллик бўлади. Бу очофат босқинчилар Тошкентда бузиш ва сотиш мумкин бўлган жойларни сотиб тугатиб бўлди. Парклар энг охирги қалъа. Аста-секин паркларни эгаллаш, пулли қилиш ва бир четдан дом, тижорий комплекслар қуриб эгаллашга ўтишмоқда. Ўтган йили “Ҳиёбонлар, истироҳат ва маданият боғларини сақлаб қолиш тўғрисида”ги қонунни ишлаб чиқиш таклиф этилганди. Ҳозирча таклиф етарлича овоз йиққани йўқ. Имконингиз бўлса қўлланг. Таклифда хусусан, хиёбонлар, истироҳат ва маданият боғларига кириш барча учун бепул бўлишини белгилаш азарда тутилган. Ўрта асрларда феадаллар деҳқонларга ўрмонларга киришни пулли қилганини тарих китобларидан ўқигансиз. Биз ўрта асрларда яшамаяпмиз, ўзбекистонликлар крепостной, ҳақсиз қуллар эмас ва тепамиздагилар феодал эмас. Ё бундай эмасми? Шундай экан ўзларини 21- аср феодали ўлароқ кўраётган айрим очофатлар паркларни, паркларнинг асл эгаси бўлган халққа қайтариши лозим ва лобуд! @the_bakiroo