Муаммоли ширкатлар ўрнини муаммоли бошқарув компаниялари эгалламайдими? Ўзлаштирилган триллионлар учун ким жавоб беради? Ўтган ҳафтада бўлиб ўтган селекторда уй-жой мулкдорлари ширкатларига ажратилган кредитларнинг 20 фоизи муаммоли экани, ҳатто имтиёзли кредитлар, муддати бир неча бор узайтирилганига қарамай сўндирилмаётгани қайд этилган. Аслида коммунал соҳага ажратилган кредитларнинг аҳволи бундандан оғир ва мураккаб, чунки қатор ширкатларнинг кредитлари турли йўллар билан бошқа манбалар ҳисобига мажбурий сўндириб борилаётгани ҳолати расмий рақамларда акс этаётгани йўқ. Эътибор берсангиз, вилоятларда битта ширкатга тўғри келадиган кредит юки Тошкентдагидан каррасига юқори. Айниқса бу борада Ўзбекистон қонунлари амал қилмайдиган Андижон вилояти етакчи. Йиллар давомида ширкатларга кредит расмийлаштириб пул ўзлаштириш, ҳатто кредит зарурияти бўлмаган ширкатларга ҳам маъмурий босим билан кредит ажраттириш бу вилоятда қоида бўлган. Том алмаштириш, подъездни бўяш усули билан миллиардлаб маблағлар ўзлаштирилган. Ҳокимият билан чатишиб кетган ширкатларнинг раҳбарлари репутацияси, сифати ва ўтмиши эса алоҳида бир мавзу. Энди мазкур ширкатлар шошма-шошарлик билан тугатилиб, ўрнига бошқарув компаниялари ташкил этилмоқда. Лекин ширкатларга ҳокимият босими билан берилган 1,4 триллион сўмлик кредитлар тақдири нима бўлади? Еган еди, ҳазм бўлди, қозонлар ёпиқ қолаверадими? Ҳокимларнинг ва уларнинг ширкатлардаги шерикларида қандйдир жавобгарлик бўладими? Талаб шуки, токи ширкатлар банклар олдидаги кредитларини сўндирмагунча тугатилмаслиги керак. Ҳокимлар ширкатларни тугатмоқчи бўлса, аввал, марҳамат қилиб, уларнинг кредитини ёпиб қўйишларини ўйласин. Кейинги масала эса Бошқарув компаниялари билан боғлиқ. Амалиётда ўзбекча ура-урачилик, маъмурий йўл билан билан ташкил этилаётган бошқарув компаниялари яна ҳокимиятларнинг чўнтакларига айланиши эҳтимоли юқори. Эртага бу компанияларга яна кредит бериш кампаниявозлиги бошланиши ҳам табиий. Ихтиёрийлик, бозор тамойиллари асосида ишлайдиган компаниялардан фаол таклифлар бўлмаса, ширкатлар фаолиятини тўхтатмай туриш лозим. Дарвоқе, ҳурматли ўзбекистонликлар! Қанақадир ҳоким ёки уй-жой коммунал хизмат кўрсатиш бошқармаси рўйхат тузиб ширкатларн тугатиб юборишга асло ҳаққи йўқ. Кўп қаватли уй-жойларда яшовчилар, билинг, сизнинг қарорингизсиз ширкатларни тугатишга ҳеч кимнинг ҳаққи йўқ. Ўрнига мажбурлаб Бошқарув компанияси тузиб у билан шартнома туздиришга ҳам. @the_bakiroo