Тийиқсиз ўзбек чиновниклари учун яна бир имконият берилмоқда Агар тепадагиларнинг манфаатларига зарурат туғилса, қонунчиликка ҳам, норматив ҳужжатларга ҳам тегишли ўзгартиришлар кунлар, ҳафталар ичида киритилади. Эсингиздами, ахборот тарқатиш эркинликларини чеклаш дея баҳоланган «Ахборотлаштириш тўғрисида»ги қонунга ўзгартиш ва қўшимчалар киритиш ҳақидаги қонун қанчалар тез қабул қилингани? Ёки ер муносабатлари бўйича, кўп қаватли уй-жойларни бошқариш юзасидан қонунчилик нормалари қанчалар шошма-шошарлик билан ўзгармоқда? Ҳатто лойиҳасини ҳам жамоатчиликка тақдим этишни лозим кўришгани йўқ. Агар ўзгаришларни жамият, жамоатчилик истаса-чи? Шунақа тезкорлик ва оперативликни кўрамизми? Йўқ, йўқ ва яна йўқ! Коррупцияга қарши кураш пакетлари 4 йилдан буён кун тартибида. Ҳар ёзда ёки баҳорда янги ва янги ваъдалар берилади, янги дедлайнлар белгиланади. Масалан, чиновниклар даромадлари. активлари ва харажатларини декларациялашни назарда тутган мана бу лойиҳага яқинда 2 йил бўлади. Ўзбек чиновниги даромадлари ва унинг ноқонуний орттираётган бебилиска бойликларини ҳеч қурса тийиб туришга бир қадам қўйилдими? Йўқ. Чилонзордаги бир хонали квартирасини ижарага берган пенсионер ҳар йили декларация тўлдиради. Лекин миллиардерга айланган ўзбек чиновниги манфаатларига келганда бу идоралараро келишув ва чуқур ўрганишлар кераклигини рўкач кўрсатишади. Давлетов бекорга яна овоза қилинаётган янги анонс ҳақида тўхталиб, Дубль-3 дея сарлавҳа қўймаган. Ҳали Дубль-4, 5 ларни ҳам кўрамиз. Чунки ҳали бор. Ўзбек чиновниклари кейинги 30 йилда ва айниқса улар учун очофатларча ўмариш имкони берилган, омон-омон замонга айланган кейинги 5 йилда ўзлаштирилган ноқонуний даромадларини легаллаштириб, четга олиб чиқиб, расман миллионер ва миллиардерларга айланиб олишгунича яна вақт керак чунки. Назаримда, бу анонслар коррупцияга қарши"куф-суф"лардан чарчаган халқ учун эмас, чиновниклар учун аслида. Эй ўғри ва муттаҳам биродарлар, тадоригингларни кўринглар, бу сизлар учун яна бир муддат. 6 ой муддат қўйдик, барибир қонунчиликда акс этгунча яна 6 ой, 1 йил ўтади. Ортиқ чўзиб тура олмаймиз. Ўзи бизга ишонч йўқ, кимлигимиз ёш болагаям маълум бўлиб бўлди, энди кулишни бошлашмоқда дейишмоқчи. ИМҲО, албатта. @the_bakiroo