«Ҳеч қандай „лазейка“ларга жой қолмасин». Депутат Ғаниев Ер кодексига киритилаётган ўзгартишлар ҳақида Ер кодексига ўзгартиш ва қўшимчалар киритиш тўғрисидаги қонун лойиҳаси ўн кун аввал биринчи ўқишда кўриб чиқилган. Эсингизда бўлса, бу бўйича қатор хавотирларимизни билдиргандик. Онгли ва онгсиз равишда яратилган лазейкалар тугатилишига умид қилиб қолгандик. Ўқиш давомида халқ сайлаган кам сонли депутатлар лойиҳа бўйича жуда жиддий саволларни ўртага ташлаганлар. Депутат Дониёр Ғаниев қонун лойиҳасида акс этган норма — 10 млн АҚШ долларидан кам бўлмаган лойиҳа қийматининг камида 10 фоизини махсус ҳисоб рақамига олдиндан киритганда жисмоний ёки юридик шахсга ер ажратиш — бозор тамойилига қанчалик тўғри келишини сўроқ остига олган. «Бизни асосий мақсадимиз — қонун ва фармон билан ер муносабатини бозор муносабатлари асосида тартибга солиш нуқтаи назаридан келиб чиқсак, бу норма Ер кодексига киритилаётган ўзгартишларнинг руҳиятига қанчалик тўғри келади? Салоҳиятли инвесторнинг лойиҳаси қанчалик тўғри эканлигини бозор муносабати белгилагани тўғри эмасми? Бюрократик ҳокимият орқали кимнинг лойиҳаси яхшилигини белгилашдан кўра, уни очиқ аукцион, танлов орқали бозорни ўзи белгилагани яхши эмасми? Мани ишончим комил, 10 млн АҚШ долларлик лойиҳа бир неча юз минг долларга ер сотиб олишга имконияти бўлади», — деган Ғаниев. Шу билан бирга депутат Ғаниев чет эл фуқаролари ва юридик шахсларга ер ажратиш, давлат-хусусий шерикчилик деган ёрлиқ билан ердан фойдаланиш ва тақсимлаш бўйича таклиф этилаётган нормалар келажакда жиддий коррупцион ва миллий хавфсизлик билан боғлиқ муаммолар яратиши мумкинлигига эътибор қаратган.