Муаммоли кредитлар ўсмоқдами ёки тан олинмоқдами? Регулятор тақдим этаётган статистик маълумотлардан келиб чиқиб, муаммоли кредитлар шиддат билан ўсиб бораётгани ҳақида фикрлар билдирилмоқда. Аслида ҳам шундайми? Муаммоли кредитлар қолдиғи ўсиб бораётгани рост, лекин NPL ўсаётганини энг асосий омили - унинг тан олинаётганидир! Масалан, июнь ойининг ўзида муаммоли кредитлар қолдиғи 2,8 трлн.сўмга ўсган ва 16,8 трлн.сўмга етган. Бу жами кредит портфелининг 5,6 фоизи. Банклар қирқимига қаралса, фикримизнинг тасдиғини кўришингиз мумкин. Масалан, Халқ банкида 1 июнь ҳолатига 1,3 трлн.сўм муаммоли кредит бўлган, бир ой ичида бу кўрсаткич 3,2 трлн.сўмгача ошган. 30 кун ичида портфели 21 трлн.сўм бўлган банкда муаммоли кредитлар қарийб 2 трлн.сўмга ошиб кетиши мумкин эмас. Яъни Халқ банки мисолида кўриш мумкин: Муаммоли кредитлар ўзи мавжуд эди, улар тан олина бошланди. Худди шундай фикрни Қишлоққурилишбанк, Агробанк ёки Капиталбанк мисолида ҳам айтиш мумкин. Муаммоли кредитлар тан олиниб, уларнинг қолдиғи ўсаётганига қарамай, кредитлар бўйича йўқотишларга қарши резервлар мутаносиб миқдорда ташкил этилаётгани йўқ. Июнь ойида 2,8 трлн.сўмга ўсгани ҳолда қўшимча атига 0,5 трлн.сўм захиралар яратилган холос. Айрим банкларда тан олинган NPL суммасига мутаносиб миқдорда захиралар яратилганида уларнинг капиталининг етарлилиги бўйича муаммолар юзага келиши мумкин. @the_bakiroo