Ўзбекистон қачон ОДКБ аъзосига айланди? Россия мудофаа вазирлигига оид сайтда ОДКБ аъзоларининг 500дан зиёд фуқаролари Афғонистон ҳудудидан эвакуация қилингани ёзилмоқда. Латипов ОДКБ аъзолари ўлароқ Ўзбекистон ҳам саналганига эътибор қаратмоқда. Хабар ёзилганига қарийб етти соат бўлди. Лекин шу пайтгача "хато" тузатилгани йўқ. Қўрқасан, балки бу хато эмасдир? Ўзбекистон зўравон Россия етовидаги вассаллардан иборат бу ҳарбий-сиёсий ташкилотни 2012 йилда тарк этган. Маълумот учун 2012 йилда қабул қилинган «Ўзбекистон Республикасининг Ташқи сиёсий фаолияти концепциясини тасдиқлаш тўғрисида»ги Қонунига кўра, Ўзбекистоннинг ҳарбий-сиёсий блокларга аъзолиги тақиқланган. Таъкидлаш жоизки, Концепция қонун даражасида қабул қилинганига қарамай, халқдан, жамоатчиликдан яшириб қўйилган. На Олий мажлис Сенати, на Қонунчилик палатаси, на Конституцион суд ва на Ташқи ишлар вазирлиги нега Ташқи сиёсат концепцияси ўзини очиқ деб эълон қилган Янги Ўзбекистонда махфий ҳолда қолаётганига изоҳ бермаган.