Ташқи сиёсат концепциясини янгилашга зарурият борми? 2012 йилда қабул қилинган Концепция бизни турли нифоқлашаётган қутблар, бало-қазоларга шерик қилувчи блок ва тарафкашликлардан сақланишимизда жуда муҳим аҳамиятга эга. Менинг назаримда, ҳужжатни янгилашга зарурият йўқ, агар биз ўзимизни, айтайлик, Швейцария каби расман нейтрал давлат, деб эълон қилишни кўзламаётган бўлсак. Концепциянинг ҳарфи ва руҳи, агар унга риоя қилиш иродасини йўқотмасак, бизни ЕОИИ, ОДКБ, БРИКС каби сиёсий, ҳарбий ёки бир давлатнинг доминантлигидаги иттифоқ ва уюшмалардан узоқда туришимизга кифоя қилади. Концепцияни янгилашга қаратилган чақириқлар, тўғриси, мени қўрқитади. Масалан, 2021 йилда ЕОИИга киришга қаттиқ босим бўлганида ҳам бу кун тартибига чиқарилган эди. Россиянинг Украинага босқинигина ўшандаги ҳаракатларни (балки вақтинча) тўхтатган, деб ўйлайман. Шунинг учун, ҳозир агар нимадир қилиш керак бўлса, мавжуд Ўзбекистон Республикасининг Ташқи сиёсий фаолияти концепциясини эълон қилиб қўйиш керак. Бўлди. Дўстларгаям, нодўстларгаям етади шу.