Машинада пахта терими ҳақида Маълум бўлишича Ўзбекистонда 15% пахта машинада терилмоқда. Ўтган йиллар давомида машина терими улушини ошириш бўйича жуда кўп режалар айтилган ва қарорлар чиқарилган. Пахта терими роса авжига чиққан шу кунларда уларни яна бир бор эслашнинг айни вақти. Узоқ 2013 йилда 2016 йилга бориб 80-90% пахта машиналарда териб олиниши айтилганди. 2016 йилдан 3 йил ўтиб Бош вазир ўринбосари 2020 йилдан Тошкент, Сирдарё, Жиззах, Қашқадарё вилоятларида пахтани машинада териш ҳажмини 50 фоизга, келгуси йилларда эса 80 фоизга кўтариш режалаштирилганлиги ҳақида баёнот берганди. Ўша тўртта вилоятда, улар орасида Қашқадарё ҳам бор, машина терими улушини 50%дан ошириш учун 1000та пахта териш машинаси етказиб беришни назарда тутган Ҳукумат қарори ҳам қабул қилинган. Мана энди машинада пахта терими улушини келаси 5 йилда 60 фоизга етказилиши режалаштирилгани маълум қилинмоқди.