Захираларимиз ўтган йилги кўрсаткичлар ҳажмигача қисқарган Сентябрь ойи давомида ялпи захираларимиз 1 млрд.доллардан ортиққа қисқарган ва 34,4 млрд.долларни ташкил этмоқда. Бу миқдор ўтган йили 1 сентябрь ҳолати кўрсаткичи даражасида ва айни вақтда олтин-валюта захираларимиз қолдиғи ташқи қарз ҳажмидан ортда қола бошлади. Захираларимиз камайиши энг аввало 500 млн долларга яқин миқдордаги валютадаги активларнинг қисқариши ҳисобига юз берган. Олтин кам сотилаётгани ҳисобига йил бошидан буён валютадаги активлар қолдиғи қисқариб бормоқда. Сентябрда олтин соф физик ҳажми ортганига қарамай, унинг қолдиқ қиймати олтин котировкалари пасайиши ҳисобига 500 млн.доллардан зиёдга камайган. Одатда олтин сотилмаган ойларда олтиннинг физик ҳажми ўртача 300 млн троя унциясига кўпайиб борарди. Сентябрда физик ҳажм фақат 200 троя унциясига ошгани инобатга олинса, эҳтимолки, ўтган ойда олтин ишлаб чиқарилувчилардан сотиб олинган олтиннинг бир қисми экспорт қилинган бўлиши мумкин. ХВЖнинг СДР қўшимча эмиссияси ҳисобига августда 752 млн.долларга кўпайган СДР қолдиғи ҳам долларнинг мустаҳкамланиши эвазига бирмунча камайган.