Қарийб 4 миллион сайловчи сайловга бормаган Марказий сайлов комиссияси Президент сайловлари бўйича якуний миқдорий маълумотларни очиқлади. Келтирилган маълумотлардан қарийб 4 миллион, аниқроғи 3 946 564 нафар сайловчи сайловга бормагани англашилади. Бу 1991 йилдан буён ўтказилган президент сайловларидаги энг юқори кўрсаткичдир. Шу ўринда сайловга бормаслик сабаблари ҳақида ҳам тўхталиб ўтишга тўғри келади. Биринчи навбатда бу бюллетенга киритилган номзодлардан ҳеч бири сайловчига маъқул келмаслиги, номзодлар таклиф этаётган ғоя ва мафкураларни қабул қилмаслиги билан боғлиқ. Албатта иштирок этмаслик сабаби касаллик, сафар ё оддийгина истакнинг йўқлигига ҳам боғлиқ бўлиши мумкин. Нима бўлгандаям, таклиф этилган номзодларнинг ҳеч бири маъқул бўлмаган сайловчилар учун ҳам танлов имконияти бўлиши керак. Бу "Ҳаммага қарши" графаси. Бюллетенга "Ҳаммага қарши" графасининг қўшилиши нафақат сайлов қонунчилигини халқаро демократик стандартларга яқинлаштиради, балки қавсдан ташқарида қолаётган, балки ўзгача фикрли электоратнинг тегишли сигналларини олишга ҳам имконият яратади. Балки ўйлаб кўриш вақти етгандир?!