​Инфляция интригаси Бугун кечга яқин инфляция статистикаси эълон қилинади. Айнан бугунги расмий рақамлардан келиб чиқиб, 2021 йил учун инфляция прогнози белгиланган мақсадли кўрсаткич - 10 фоиздан паст бўлиши ё бўлмаслигини баҳолаш мумкин бўлади. Агар ноябрь ойи инфляцияси 1,2%дан юқори бўлмаса, бунга кичик имконият бор. Лекин сентябрда бошланган ва ўтаётган ойда шиддат билан ошган ёқилғи нархлари ва тизимли узилишлари, унинг таъсири озиқ-овқат, ноозиқ-овқат товарлари ва хизматларга кўчиб улгургани инобатга олинса, бунга эришиш қийин, жудаям қийин. Айни вақтда асосий савдо ҳамкорларимизнинг барчасида инфляциянинг прогнозлардан ортиқ бўлиши кутилмоқда. Яъни, 2021 йил учун АҚШдан тортиб Афғонистонгача барча мамлакатларни қамраган инфляция асосий муаммога айланди. Масалан, Россияда инфляция прогнози 7,4% (аввалги прогноз 5,8% эди), лекин йил якунлари бўйича инфляция 8%дан юқори бўлиши турган гап. Қозоғистонда инфляция коридори 6-7%, лекин амалда 9% атрофида инфляция кутилмоқда. Туркияда ориентир 5%, лекин инфляция 20%дан ошиб кетиб бўлди. Энг йирик иқтисодиёт АҚШда янгиланган прогноз 5,8%гача оширилган, лекин бу мақсадга эришиш қийин бўлиши ҳозирданоқ тан олинмоқда. Йирик давлатлардан фақат Хитойда расмий инфляция 3%лик прогноздан ортда қолмоқда. Лекин саноат инфляцияси (13,5%) шиддат билан ошаётгани келаси йилдан бошлаб бу истеъмол нархлари индексига ҳам кўчишини англатади. Асосий импортеримиз Хитой экани ҳисобга олинса, 2022 йилда бу бизга кўчиб келадиган инфляцияни ташиши аниқ. @the_bakiroo