Ишоралар берилди: давом эттиравериш мумкин Муҳрим маладес-да. Журналист қилиши керак бўлган ишни қилади, фактлар ва воқеалар кетма-кетлигини маржонга тергандек тузади, охирида энг керакли саволларни беради. Қолгани зийрак ўқувчига ҳавола. Ўзи давом эттириб кетаверади. Муҳримнинг ёзганларини ўқиётганда худди картина олдида тургандек бўласиз, мусаввир муҳрлаган тасвирнинг давомини ўзингиз жонлантира оласиз, агар истасангиз ва зеҳниятингиз етса. Хуллас, картинанинг давоми. Биринчидан, оила аъзолари фойдасига миллиардлаб суммада манфаатлар тўқнашувига йўл қўйган Абдухолиқов 1,5 млн сўм пора учун 5 йилга қамалган ўқитувчи эмас. У ўтган ва янги даврнинг номенклатура аъзоси, катта эҳтимол янги янги замондаям унга биринчи қатордан жой тегади. Шунинг учун 8 млн.сўм жарима. Бу огоҳлантириш варақаси, жазо эмас. Иккинчидан, миллиардлаб, балки триллионлаб манфаатлар тўқнашувларга йўл қўйган ва қўяётган Сангинов, Артикходжаев, Зокиров, Солиев ва бошқа ўнлаб, юзлаб ўзбек чиновниклари кейсини Абдухолиқов билан солиштириб бўлмайди. Абдухолиқов садоқатли ўзбек чиновникларига мумкин бўлмаган хатога йўл қўйди. Қолган садоқатлилар қолган жойидан бемалол давом эттираверишлари мумкин. Учинчидан, янги замонда номенклатура аъзолари учун жазо ўтган замондагидек Жаслиқ ё чангга айлантириш ё бор ўзлаштирганини тортиб олиш бўлмайди. Шунчаки лавозими ўзгартирилади, нари борса лавозимларидан бири тортиб олинади. Энг оғир жазо ўлароқ биронта туманга ҳоким қилиб жўнатилади. Тўртинчидан, коррупцияга қарши кураш шовқини давом этади, агар исталинса, тепага қараб баландлаштирилиши мумкин. Фас дейилса бўлди, шовқин ошади, фас дейилса пасаяди. Кунлар ва соатлар ичида. Ниҳоят бешинчидан, бундан кейин ҳам нимани кўриш ё нимани кўрмасликни ҳал қилишдек оддий танловни ўзбекистонликларнинг ўзига қолдиришмайди, Гап ўзбекистонликларнинг маънавияти бузилиб қолишида эмас, очиқ, беҳаё ё менталитетга, мафкурага зид деб топиладиган саҳналар, кадрлар, клиплар, матнлар, мақолаларни чеклаш зўр восита эканлигида, авомни бошқаришда тақиқ ўрнини босувчи топилмаганида ва бундан кейин ҳам ўзбекча назорат менежментининг кучли қуроли ўлароқ сақланиб қолишида. @the_bakiroo