Мол-мулк солиғи бўйича камайтирувчи коэффициентлар қўлланилмоқдами? Сенат ахборот хизматининг 31 январь куни эълон қилинган ахборотида ёзилишича, 38 та туманда мол-мулк солиғи бўйича энг кам қийматга 0,5 гача бўлган камайтирувчи коэффициентларни қўллаш масаласи муҳокама қилиниб, тегишли қарорлар қабул қилинган. Лекин вилоят ва туман кенгашлари қарорлари эълон қилиб бориладиган E-Qaror платформасида 2022 йил 31 январь ҳолатига юридик шахсларнинг мол-мулк солиғи бўйича камайтирувчи коэффициентларни қўллашга оид биронта қарор мавжуд эмас. Платформага жойлаштирилган мол-мулк солиғига оид иккита қарор Жиззах вилояти (8 январь VI-30-9-3-0-K/22) ва Сурхондарё вилояти (21 январь VI-42-15-8-0-K/22) Кенгашлари томонидан тасдиқланган. Лекин уларда ҳар икки вилоят Кенгаши тегишли вилоятлардаги барча туманларга нисбатан мол-мулк солиғи бўйича 1,0 коэффициентни қўллашни лозим топган. Яъни пасайтирувчи коэффициент биронта ҳудудга нисбатан қўлланилмаган. Эслатиб ўтамиз, мол-мулк солиғи бўйича бўнак тўловларини ҳисоблаш учун маълумотнома топширишнинг охирги муддати этиб 31 январь белгиланган. Балки вилоят ва туман кенгашлари орқа сана билан қарор қабул қилишаётгандир, ким билади.