Мол-мулк солиғи бўйича камайтирувчи коэффициентлар қўлланилган туманлар рўйхати эълон қилинди Очиқланган ахборотга кўра, Қорақалпоғистон Республикаси, Бухоро, Наманган, Самарқанд, Сирдарё, Фарғона ва Хоразм вилоятларида барча қишлоқ туманларида камайтирувчи коэффициентлар қўлланилган. Андижон вилоятида бизнес томон енгиллик ўлароқ кўрилган мазкур масаладаям "зиқналик" қилинган. Вилоятнинг 7 та туманида камайтирувчи коэффициент қўлланилмаган. Энг қуйи 0,5 коэффициент эса умуман ишлатилмаган. Шунингдек, Республика бўйича барча вилоят марказлари ва вилоятга бўйсунувчи шаҳарларда мол-мулк солиғи бўйича 1,0 коэффициент сақланиб қолинган. Мол-мулк солиғининг энг катта юкламаси тўғри келадиган Тошкент шаҳри бўйича ставкаларнинг камайтирилган коэффициентлари қўлланилгани ёки қўлланилмагани ҳақида ахборот иловага қўшилмаган. Солиқ органларига 2022 йил 1 апрелгача тақдим этилган мол-мулк солиғи суммаси бўйича аниқлаштирилган маълумотномалар солиқ тўловчининг “таҳлика” ҳолатига таъсир этувчи омил сифатида қаралмаслиги таъкидланган.