Танзила Нарбаева: “Тор доирадаги шахсларнинг манфаати халқ манфаатидан устун бўлиши керак эмас” Сенат раиси билан мулоқотда солиқ тўлашда айрим корхоналарга ёки йирик тадбиркорларга кўплаб истиснолар, қўшимча қоидалар, имтиёзлар ва преференциялар берилаётганлиги бозор эркинлигига, рақобат муҳитига, солиқ тизимининг шаффофлигига салбий таъсир қилаётганлиги танқид қилингани айтилмоқда. Жудаям зўр. Инқилобий сўзлар ҳатто. Сарлавҳадаги фамилияга қаралмаса, иқтидордаги эмас, мухолифатдаги одам гапираётган сўзларга ўхшайди. Танзила Норбоева, шу сиз таъкидлаган манфаат яратаётганларнинг номи ва лавозимлари ҳам бор. Уларни Сенатга бир чақирсангиз, масалан текинга ер ажратиш ва манфаатлар тўқнашуви мавжуд қарорлар қабул қилишда етакчи бўлган, унга келганида қоидалар четланиб турадиган сенатор ва Тошкент шаҳар ҳокими Артикходжаевни, масалан, Ўзбекистон ЯИМининг чорак қисмини яратаётган энергетика ва металлургия комплексларини ишончли бошқарувга бериб юбораётган жаноб Султоновни ва албатта имзолаётган қарорларидан преференция ва имтиёзлар топмаслик қийин бўлган Бош вазир Ариповни. Ва бу ишларни қанақадир рейтинг ва индекслардаги ўрнимизни яхшилаш учун қилиш керакмас. Мақсад рейтинг ва формализм бўлмаслиги лозим. Мақсад элитар ўғирлик ва сиёсий даражадаги коррупцияни камайтириш, мамлакатни қолоқлик йўлидан чиқариб эркин тараққиёт томон илдамлашишини таъминлаш.