Уй-жой нархи ўсишда давом этмоқда. Нима қилмоқ керак? Уй-жой нархларининг ўсиши нисабатан "ўлик" ой ҳисобланган январда ҳам давом этди. Хусусан, иккиламчи бозорда нархлар бутун Ўзбекистон бўйича ўртача 1,4%га ошган бўлса, Тошкент шаҳрида ойлик ўсиш 2,4%га етган. Ҳисоб-китобдан хабари бор одамга тушунарлики, нархларнинг юқори ўсиш шароитлари сақланиб қолаётган даврда ипотека кредитининг нисбий афзаллиги янада ошади. Уй-жой хариди ниятида юрганлар учун нархларнинг ойлик ўсиши 1,5%дан ошганда ҳар қандай мақбул ипотека, 2%дан ошганда эса ҳатто тижорий ипотека нисбий фойдалироқ бўлиб қолади. Шу маънода масалан, ипотекани қайта молиялаш компанияси ресурслари ҳисобидан ипотека кредитлари ажратиш фаоллашишини кутиб ўтирмай, иккиламчи бозордан тижорий шартларда ипотека расмийлаштириш ҳам яхши вариантга айланмоқда. Дарвоқе, тижорий ипотека кредитларининг суммаси, муддати ва бошқа шартлари ипотекани қайта молиялаш компанияси мезонларига мос тушса, компаниянинг агентлари бўлган банклар билан бош битимларда бу кўзда тутилган бўлса, тижорий ипотека кредитларини ипотекани қайта молиялаш компанияси ресурслари ҳисобидан қайта молиялаштириш мумкин бўлади. Бошқача айтганда, 22-24%лик тижорий ипотека кредитларини 18-19%лик мақбул ипотекага қайта молиялаш воситасида ўтказиш мумкин. Албатта бунинг учун аввал тижорат банклари ипотека кредитлари шартларини батафсил аниқлаштиринг. @the_bakiroo