Махфий утилизация? Ўғри Путин ғорат қилаётган Украинадан маҳаллий монополистлар ғорат қилаётган Ўзбекистонга қайтамиз. Сайланган депутат Кушербаевнинг ёзишича, Uzauto Motors тўлаши лозим бўлган утилизация йиғими бўйича Ҳукумат идораларига сўроқ киритилган. Назаримда сайланган депутатлар ҳам монополист Uzauto Motors қонунларимизда белгиланган утилизация йиғимини амалда тўламаётгани бўйича етарли асосларга эга гумонларга дуч келишган. Не тонгки, дупутатларнинг сўровига жавобан Ҳукумат бу сафар ҳам махфий жавоб юборган. Яъни бу жавоб билан танишиш мумкин, лекин ошкор қилиш асло мумкин эмас. Айтиш керакки, Uzauto Motors билан боғлиқ махфийлик биринчи марта рўй бераётгани йўқ. Аввалроқ Ҳукумат ўзининг суюкли арзандаси Uzauto Motors ёпиқ протоколларга кўра чайқовчилик лойиҳаси доирасида импорт қилинган автомобиллар бўйича бож тўламаётгани борасидаги депутатлар саволларига жавобларни мутлақо махфийлаштирган эди. Товба дейсан. Uzauto Motors танк ё замбарак ишлаб чиқараяптими? Ё ҳарбий дронларми? Нега бунчалар махфийлик? Махфийлик ортида давлат ва ҳарбий аҳамиятларга эга маълумот бўлмаса, демак, хулоса қилиш мумкинки, бунинг ортида фақат қонунга зид ҳаракатлар, ёлғон ва ўзлаштириш бўлиши мумкин холос. Ҳақиқатни тан олиш ва очиқлаш наҳотки шунчалар қийин? Бугун ҳар бир ОАВ, ҳар бир жамоатчилик вакили такрорлаши керак бўлган савол шу: Uzauto Motors утилизация йиғимини тўлаяптими ёки йўқми?