Ўзбек сўми кеча 0,43%га қийматини йўқотди Кечаги савдоларда ўзбек сўми АҚШ долларига нисбатан 46,85 сўмга қийматини йўқотган. Битта сессия давомида миллий валютанинг қадрсизланиши кўрсаткичи бўйича бу 2020 йил 15 апрелдан буён янги максимум. Лекин кечаги ўзгаришларнинг Россия-Украина кескинлигига алоқаси йўқ. Кеча биржадаги колл-аукционларда жуда катта миқдорда валюта сотиб олиш буюртмаси юз берган кўринади. Сессия давомида 366,96 млн долларлик савдо ҳажми амалга ошгани ҳам буни тасдиқлайди. 2022 йил давомида кунлик савдолар ҳажми энг кўпи билан 137 млн.долларни ташкил этган эди. Кеча Украинанинг босиб олинган ҳудудларидаги ДНР ва ЛНР деб аталган тузилмалар Путин Россияси томонидан тан олингандан сўнг доллар/рубль 80,40 долларгача етган. Кескинлик ортидан олтин котировкалари 1914 долларгача етган. Нефть 97 доллар атрофида савдо қилинмоқда. Фонд ва валюта бозорларида кеча бошланган қалтироқлар бугун ҳам давом этади. Россиянинг асосий биржа индекси 13%га пастлаган. Путин Россиясининг таянч компаниялари бўлган Газпром акциялари 10%га, Роснефть эса 15%гача арзонлаган. Россия банклари, металлургия компаниялари акциялари ҳам қулашда давом этмоқда.