Сўмнинг барқарорлиги сақланмоқда Кеча тунда Қўшма штатлар ва Европа Иттифоқи, тонгга яқин эса Канада Россиянинг босқинчилик сиёсатига қарши янги санкцияларни очиқлади. Хусусан, Қўшма штатлар эълон қилган санкцияларнинг биринчи транши тизимли банклар «Промсвязбанк» ва «ВЭБ», уларнинг шўъбалари, сиёсий элита ва уларнинг фарзандлари, Россия қимматли қоғозларини қамраб олди. Ўтган 3 кун ичида Россиянинг энг бой 23 миллиардери жами бўлиб 32 млрд.доллар йўқотгани маълум қилинди. Энг катта йўқотиш Путиннинг ўғри ошнаси Тимченко активлари билан юз берган (минус 8 млрд.доллар). Аввалроқ Путин ЛНР ва ДНРнинг тан олиши Донецк ва Луганск вилоятлари ҳудудини тўлиқ қамрашини маълум қилди. Бу вазиятни янада оғирлаштирди ва уруш эҳтимолини кучайтирди. Россиянинг Сенати Путин Армиядан фойдаланишига рухсат берди, Украинада бутун мамлакат бўйлаб фавқулодда вазият эълон қилинди. Юз бераётган воқеалар рубль волатиллигини ҳаддан зиёд кучайтирмоқда. Доллар/рубль курси 79-81 оралиғида кескин тебранишда давом этмоқда. Danske Bank прогнозларига кўра, тўлақонли ҳарбий ҳаракатлар бошланса доллар/рубль 85дан ҳам қуйироққача қулайди. РТС индекси охирги уч кунда 25%дан зиёд қийматини йўқотди ва пасайишда давом этмоқда. Бугунги эрталабки колл-аукцион сессияларида сўм долларга нисбатан яна ўртача 30 сўмга мустаҳкамланган. Банкларда доллар сотиш ва сотиб олиш чакана курслари ҳам пасайиб бормоқда. Айрим банкларда мавсумий такрорланувчи нақд валюта ортиқча ликвидлиги ҳам кузатилмоқда.