Қутулгани рост бўлсин! “Ўзагроэкспортбанк” устав капиталидаги 100 фоиз давлат акция пакети Россиянинг “Совкомбанк” банкига 4 млн. АҚШ долларига сотилгани бўйича хабарлар айрим фойдаланувчиларда савол туғдирган бўлиши мумкин. Ахир, банклар учун устав капитали энг кам 100 млрд.сўм бўлса, нега банк 4 млн долларга (43,5 млрд.сўм атрофида) сотилади қабилида. Биринчидан, “Ўзагроэкспортбанк” пайдо бўлганидан буён капиталини тўлиқ шакллантирмаган. Шаклланган устав капитали 70,9 млрд.сўмдан иборат бўлган. Иккинчидан, банк фақат зарар билан ишлаб келган ва ўзи шаклланмаган капиталини ҳам еб келган (охирги 2021 йилни 16,7 млрд.сўм зарар билан ёпган). Баланс бўйича соф активлари йил бошига 66,5 млрд.сўмни ташкил этган. Учинчидан, Банкнинг атига 30 млрд.сўмлик кредит портфелининг 55%и муаммоли. Бу расман. Лекин амалда портфель 100% муаммоли ҳисобланган. Яъни амалда бу портфелни қоплаш учун исталган янги инвестор, яна қарийб 21 млрд.сўм қўшимча захира қилишга мажбур. Яна банк балансига олинган қарийб 20 млрд.сўмлик мулклар бор. Улар бўйича ҳам, ҳеч қурса субстандарт тоифа дея йўқотишларни ҳисобланг. Энди банк соф активларидан қўшимча захира қилиниши лозим суммани чегиринг: 43,5 млрд.сўм қолади. Бу 4 миллион доллар. Банкнинг биноси йўқ. Иловаси йўқ. Мижози йўқ. Репутация манфий. Лицензиясидан бўлак кўзга суртадиган ҳеч нарсаси йўқ. Бунақа активдан қутулганда шукур қилиш керак. Афсуски, худди “Ўзагроэкспортбанк” каби ҳолатда бўлган, лекин активлари бир неча триллион сўмлик давлат банклари яна тиқилиб ётипти.