Прогнозлар уч кун ҳам яшамаяпти Шу кунларда ҳар қандай таҳлил ва прогнозларнинг умри ойлардан ҳафталарга, ҳафталардан кунларгача қисқармоқда. Энг ёмон сценарийлар энг мақбул сценарийларга айланмоқда, бирон бир модель тез ўзгараётган воқеликка муносиб жавобларни тақдим этмаяпти. Шу маънода муҳим қарорларни қабул қилишга шошилинмаётгани кўп жиҳатдан тўғри ҳам. Қолаверса, биз Россия билан бир иқтисодий маконда эмасмиз ва бу бизнинг энг катта ютуғимиз ҳам. Россияда юз бераётган негативлар эртасигаёқ Қозоғистон ва Қирғизистон иқтисодиётида акс этса, бизда чоралар, тайёргарлик кўриш учун, вазиятни юмшатиш ҳақида пухта қарорлар қабул қилишга бир неча ҳафталик вақтимиз бор.