Ўзбекча Пенсия реформаси ҳеч қаёққа кетишни режалаштирмаётган оқсоқоллар ташаббусими? Пенсия ёшини 62/58 ёшгача узайтириш гарчи анчадан буён муҳокама этилаётган бўлсада, фуқароларда бошқа нормал мамлакатларда ва ҳеч қурса Россияда бўлгани каби норозилик ва салбий эҳтиросларни уйғотгани йўқ. Бунинг бир неча сабаблари мавжуд. Биринчидан, пенсия ёши арафасидаги аксар ўзбекистонликлар ишловчи қашшоқлар тоифасини ташкил этади. Пенсияга чиқиш уларнинг бусиз ҳам абгор молиявий аҳволини янада абгорлаштиради. Шунинг учун аксар ўзбекистонликлар кучи етгунча ишлаб туришни, болаларига юк бўлмасликни истайди. Пенсия ёши ортса, кўпчилик қариялар қайтанга қувонади. Иккинчидан, мамлакатда меҳнат унумдорлиги ўта паст, асосий иш берувчи бўлган давлат ва давлат эгалиги субъектларида эса унумдорлик плинтусдан ҳам паст даражада. Пенсия ёши эмас, хаспўшланаётган яширин ишсизлик ва анъанавийлик асосий муаммолардан. Шартли айтганда битта самарали ишчи вазифасини учта чол ва битта момо эгаллаб ўтирипти. Чоллар ва момолар эса ҳеч қаёққа жилишни режалаштираётгани йўқ. Учинчидан, пенсия ёшини ошириш асосан қариётган мамлакатларда қилинаётган муқобилсиз, чорасиз ҳаракат. Ўзбекистон ахир қаримаяптику?! Бизда пенсия реформаси пенсия ёшини оширишни эмас, умумий қозон методидан, шахсий жамғарма методига ўтишни назарда тутиши керак. Афсуски, кейинги бунинг тескариси юз бермоқда. 2 йил аввал шахсий жамғармага даромадимизнинг 2%ини ўтказиб келган бўлсак, ҳозир 0,1 % ўтказилмоқда. Унинг устига чириб битган Халқ банки қошидаги жамғармадан бўлак альтернатива ҳалигача йўқ. Реформа дейилса, кейинги пайтда ақли хуши бор одамни қалтироқ тутадиган бўлди. Чунки реформа дея аслида антиреформа амалга оширилмоқда. Агар пенсия реформаси пенсия ёшини узайтиришни назарда тутса, ўзбеклар қариликни ўлимлик йиғиш, дуогўйлик ва қарамлик билан ўтказишда давом этаверади. Мамлакат эса абадий учинчи дунё мамлакати сифатида қолади.