Қувончли хабар: Ўзбекистон Россияга автомобиль етказиб беришни тўхтатмоқда Eurasianet'нинг ёзишича, Россияга қарши санкциялар ўзбек автомобиль заводига мамлакат ичидаги талабни қондиришга ёрдам бериши мумкин. Uzauto Motors ишлаб чиқарадиган автомобиллар Жанубий Кореядан келтириладиган ярим ўтказгичлар ва микрочиплар билан жиҳозланади, Корея эса Ғарб санкцияларига қўшилган. Табиийки, агар Uzauto Motors Россияга автомобиль етказиб беришда давом этган тақдирда эҳтиёт қисмлар етказиб бериш музлатиб қўйилиши мумкин эди. Нашрнинг ёзишича, Uzauto Motors вакили автомобилларни Россияга етказиб бериш тўхтатилганини рад ҳам этмаган, тасдиқламаган ҳам. Eurasianet.org электрон почтасига Детройтдаги GM компаниясидан юборилган маълумотда UzAuto Chevrolet автомобилларини Россияга жўнатиш 9 мартдан тўхтагани айтилган. Шундан кейин Uzauto автомобиллар ва эҳтиёт қисмлар етказиб беришда Россия портларидан фойдаланишни тўхтатганлигини тасдиқлаган, лекин барибир Россияга автомобиль сотиш масаласини муҳокама қилишни истамаган. Uzauto Motors учун Россия асосий экспорт бозорларидан бири ҳисобланади, циклик кризислар кузатилган аввалги йилларда (масалан, 2009, 2014-15) Россияда сотувларнинг тўхтатилиши ёки камайиши ҳар доим ички бозорнинг тўйиниши ва нархларни пасайиши каби ўзбекистонликлар учун вақтинчалик қувончларни келтирган.