​"Америка Қўшма Штатларига етиб олайлик ва ўзиб кетайлик!" Бундан 60 йил аввалги бу шиор ҳозир кулгули туюлиши мумкин. Лекин ўз вақти учун ўринли, балки имконли ҳам бўлган. Чунки айнан 60- йилларда Совет иттифоқи ва Ғарб ўртасида техник, технологик, иқтисодий фарқ энг минимумгача тушган. Шу вақтга келиб инсон сарфи ва экстрактив институтлар устига қурилган совет мафкураси ўзининг охирги имкониятини кўрсата олган энди, ундан ортиғига унинг қурби етмасди. Афсуски, советлар экстрактив институтларни инклюзив институтларга алмаштира олмади, коммунистик мафкура шароитида бу мумкин ҳам эмасди. Натижада, кўраяпмизки, 60 йил ўтиб АҚШга етиб олиш шиори кулгули кўринмоқда. Бугун Ўзбекистоннинг ўрта келажаги ҳақида мулоҳаза юритганда ўртача ривожланган давлатлар даражасига чиқиш (жон бошига 4 минг доллар ЯИМ), ёки бўлмасам шартли айтганда "Қозоғистонга етиб олиш", ёки "Грузияни қувиб ўтиш" чақириқларини ўртага ташлаш мумкин. Лекин қўрқаманки, агар хато қилишда давом этаверсак, бу чақириқлар яна йиллар ўтиб худди 60 йил аввалги "Америкага етиб олиш" шиорлари қанчалар кулгули бўлса, шунчалар кулгулига айланиб қолади.