Депозитлар қимматлашаётган, кредитлар эса арзонлашаётган ўзгача Ўзбекистон Март ойида асосий ставканинг кўтарилиши депозитлар ва кредитлар ставкаларига турлича таъсир қилган. Чакана депозитлар ставкалари 20,9%гача (+0,5%), корпоратив депозитлар ставкалари эса 16,2%гача (+0,7%) қимматлаган. Кўпчилик аҳоли омонатлари бўйича ставкалар 2014 йил охиридан буён энг юқори даражага етганига эътибор қаратган. Ҳа, ростан ҳам 2014 йил декабрда аҳоли омонатлари бўйича ставкалар 22,8%дан бирданига 2015 йил январда 13,8%гача пасайтирилган ва шундан буён бунчалар юқори ставкалар қайд этилмаётган эди. Кўпчилик, қандай қилиб 1 ой ичида омонатлар бўйича ставкалар 9%га арзонлашиши мумкин, деб савол бериши мумкин. Бу ўша давр учун одатий ҳолат ҳисобланган, шунчаки эслатиш учун — 2015 йил январда асосий ставка 9%га туширилгач, маъмурий тарзда омонатларнинг 14%дан юқори бўлмаслиги ва омонатлар рекламасида фоиз ставкалар кўрсатилмаслиги ҳақида банкларга топшириқ берилган. Топшириқ эса сўзсиз бажарилган. Бозор бўлмаган 2015 йилдан бозор ҳалиям йўқ 2022 йилга қайтамиз. Демак, 2022 йил март ойида депозитлар қимматлашганига қарамай, кредитлар нархи 20,8%гача (-0,5%) арзонлашган. Ҳақиқат учун айтиш лозимки, бунда чакана кредитлар 21,8%гача (+0,5%) қимматлаган бўлса, корпоратив кредитлар ставкалари 20,2%гача (-1,1%) пасайган. Корпоратив кредитлар ставкалари бирдан сезиларли пасайишини иқтисодий маънога эга ўлчовлар билан тушунтириш қийин. Катта эҳтимол, март ойида давлат назорати остидаги компаниялардан бири ёки бир нечтаси арзонроқ фоизда жуда йирик миқдорда кредит олган бўлиши мумкин.