Фурсат етди. Бошқа кечиктириб бўлмайди Назаримда, Россия-Украина уруши бўлмаганида эди 2022 йил Ўзбекистонда ислоҳотларнинг асосий йўналиши энергетика соҳаси билан боғлиқ бўлган бўларди. Учинчи йилдирки, гарчи аллақачон пишиб етилган бўлсада, энергия нархларини эркинлаштириш вазифаси кейинга қолдириб келинмоқда. Аввал бунга Коронавирус пандемияси ҳалақит қилди. Мана пандемия тугади, жиддий ислоҳотларга киришамиз дейилганда Россия-Украина можароси яна кўндаланг бўлиб қолаётгандек. Эсласангиз, Ҳисоб палатасининг давлат бюджети бўйича хулосасида 2022 йилда энергия ресурслари, жумладан, электр энергияси ва табиий газ тарифлари нархлари индексация қилиниши ҳақида сўз борганди. Кейин Марказий банк 2022-2024 йилларнинг макроиқтисодий сценарийларини баҳолашда газ, электр энергияси, иссиқлик, коммунал хизматлар тарифларини 2022 йилда бир марта тўлиқ ёки 2022-23 йилларда босқичма-босқич эркинлаштирилиши мумкинлигига алоҳида тўхталганди. Шу-шу расмийларимиз қайтиб бу мавзуни кун тартибига олиб чиқмай қўйишди. Ҳамма жим бўлиб кетди. Кўзингиз тушган бўлса керак, зарар кўриб ишлаётган ТОП-10 давлат корхонасининг еттитаси билвосита ёки бевосита энергетика билан боғлиқ. Яъни соҳа корхоналари қиёфасида биз энергетика соҳасига бозор кириб бормагани учун жуда катта товон тўламоқдамиз ва бу товон суммаси йилдан йилга ошиб бормоқда. Рақамларда акс этмаган зиённи-ку ҳеч бир қиймат билан ўлчаб бўлмайди. Шу маънода энергия нархларини эркинлаштиришни бошқа кечиктириб бўлмайди. Фурсат етди. Ҳеч бир ташқи сабаблар энди баҳона бўлмаслиги керак.