Иккинчи экспорт товаримиз бўлган мис кескин арзонламоқда. Бу огоҳ қўнғироғи бўлиши керак Бугун мис нархлари 2021 йил октябрдан буён биринчи марта 9 000 доллардан пастга тушди. Солиштириш учун, 2 ой аввал 2022 йил март ойи максимумларида мис нархлари 10 800 долларга етганди. Роса 2 йил аввал шу кунларда эса миснинг тоннаси 4 600 доллар атрофида сотиларди. Мис нархининг кескин қулаши АҚШда рецессия хатарлари ва Хитойда давом этаётган карантин чекловлари фонида юз бермоқда. Мис бозоридаги кайфият охирги ҳафталарда қондирилмаётган дефицитдан талабнинг пасайиши даражасигача ўзгариб кетди. Мис Ўзбекистоннинг иккинчи экспорт товари ҳисобланади. Йилига деярли 150 минг тонна мис ишлаб чиқарилади, экспорт қиймати 2 млрд.доллардан ошади. Ўтган эпохада хом-ашё нархларининг кескин ўзгарувчанлиги оқибатларини юмшатиш учун олтин, мис, уран каби ресурсларнинг жаҳон нархининг ошиши натижасида тушадиган ортиқча даромадлар (сверхдоходы) иқтисодиётга йўналтириб юборилмай, ФРРУ (Тикланиш ва тараққиёт жамғармаси) буферларида жамғариб бориларди. Афсуски, янги эпохада бугун топилган даромадлар бугун ишлатилмоқда ва "қора кунлар" учун керак бўлиши мумкин бўлган буфер захиралар яратилаётгани йўқ. Хом-ашё нархларига ҳаддан зиёд боғлиқ бўлган Ўзбекистон каби давлатлар учун ресурсларнинг сотишдан тушган барча даромадларнинг тўлиқ ишлатилиши циклик кризислар вақтида бюджет-молия ва иқтисодиётда оғир диспропорцияларни яратиши мумкин.