Депутат Кушербаев Твиттер бўйича сўров киритди Ўнлаб ҳукумат аъзолари, депутатлар ва ҳатто феълан мамлакатнинг иккинчи раҳбари ҳисобланган сенат раиси ташқи аудиторияга ўзларини гўёки очиқлиги ва мулоқотга тайёрлигини кўрсатишда фойдаланадиган твиттер тармоғи цензура йўқлиги айтиладиган, сўз эркинлиги макони кенгайиб бормоқда, деб лоф уриладиган серқуёш ўлкамизда блокланган ҳолда қолмоқда. Яқинда тармоққа депутат Кушербаев келиб қўшилганди. Кушербаевнинг тармоққа қўшилиши ва тармоқ қачон блокдан чиқарилиши тўғрисидаги твит-саволи тармоқда янаям кўпроқ савол уйғотди. Энди Кушербаев бу саволга жавоб олиш учун депутатлик сўрови киритмоқда. Шахсан менда твиттер нега янги Ўзбекистонда блоклангани бўйича жавоб бор: Қўрқув туфайли. Қўрқув бўлгандаям, ўзгача, кўпинча ёқимсиз, бошқариб, манипуляция қилиб, силлиқлаб бўлмайдиган фикр учун қўрқув туфайли. Ҳа, айтгандай, янгилиги қолмаган янгилар доим ўзларини эскилар билан солиштиришни жудаям ёқтиришади. Маълумот учун, ўша қора ўтмишда ҳам твиттер Ўзбекистонда блокланмаган эди.