Пул массаси ўсиши бироз секинлашган, лекин тўхтамаган Май ойида ҳам пул массаси ўсишда давом этган, лекин ўсиш суръати апрелдагига нисбатан бироз сусайган. Апрелда М2 ва Миллий валютадаги пул массаси мос равишда 9,4% ва 14,%га ўсган бўлса, май ойида ўсиш суръатлари тегишлича 9,1% ва 6,9%ни ташкил этган. 1 июнь ҳолатига М2 қолдиғи 158,5 трлн.сўмни, Миллий валютадаги пул массаси эса 108,2 трлн.сўмга етган. Албатта, апрель ва май ойлари пул массасининг мавсумий ошиши ойлари ҳисобланади, лекин бу йил сал ўзгача омиллар ҳам ўз ўрнига эга бўлмоқда. Биринчидан, пул массасининг ўсишига иқтисодий фаолликдан ҳам кўра ташқаридан хорижий валюта оқимининг ҳаддан зиёд ошгани кўпроқ таъсир кўрсатмоқда. Регуляторнинг ортиқча валюта оқимини сотиб олиши биринчи навбатда нақд пуллар қолдиғига таъсир ўтказаяпти. Буни пул агрегатлари компонентлари ичида нақд пуллар қолдиғи энг юқори суръатда ўсаётганидан ҳам кўриш мумкин. Иккинчидан, пул массасининг ўсиши ЯИМ номинал ўсишини анча ортда қолдирмоқда. Бу хавотирли, чунки инфляциянинг монетар сабабларини қўзғатиб юбориши мумкин. Тез ўсаётган пул массасини иқтисодиёт тўлиқ ўзлаштира олаёптими ёки йўқ, фақат вақт ўтгандан кейингина, нарх оқибатларда кўриш мумкин бўлади.