Бугун Федерал захира тизими ставкаси кескин оширилиши мумкин Бугун бизнинг вақт билан олганда тунги 11лардан кейин Федерал захира тизими асосий ставка бўйича қарорини ва бу бўйича шарҳларини эълон қилади. Аввалги йиғилишларда очиқланган режаларга кўра ставка камида 0,5 фоиз бандига оширилиши керак. Лекин май ойи якуни бўйича рекорд инфляция ва инфляция кутилмаларининг ўсиб бораётгани кескинроқ қарор қабул қилишга ундаши мумкин. Шу туфайли йирик инвестбанклар ставкани бирдан 0,75 ёки 1 фоиз бандигача оширилиши мумкинлигини истисно этишмаяпти. Бозор аллақачон ставкалар оширилиши "нархини" ўзида ҳазм қилиб бўлган. АҚШ ғазначилиги қисқа муддатли қоғозлари даромадлилиги 0,5-0,6%га ошиб улгурди. ФЗТ ставкасининг оширилиши ривожланаётган мамлакатлар иқтисодиётига қарз жалб қилишнинг қимматлашуви ва инвесторлар учун афзалликнинг пасайиши ҳисобига билвосита таъсир кўрсатади.