У қутбдан бу қутбга Бир нечта бандлик агентликларида юз берган алдов, махинация ва кўзбўямачиликлар ортидан Хусусий бандлик агентликларини тугатиш бўйича президентга таклиф киритилади, дейилмоқда. Хусусий бандлик агентликлари ҳуқуқий майдонга қайтганига, хусусан, Ўзбекистон Республикасидан ташқарида иш қидираётган шахсларни ишга жойлаштириш соҳасида хизматлар кўрсатила бошланганига ҳали 1.5 йил бўлмади. Унгача бу хизмат ягона, монопол ташкилот - Ташқи меҳнат миграцияси агентлиги томонидан амалга ошириб келинган. Хотирамиз жуда қисқа - агентлик нима кароматлар кўрсатгани, йиллар давомида қанақа жиноятларга қўл урилгани, ҳар йили минглаб инсонлар хор-у зор бўлганлари, куйганлари кўпчиликнинг эсидан чиқиб бўлди. Бандлик хизмати бу бозор хизмати, у шаклланиши учун, вақт, хатолар, йўқотишлар бўлиши табиий. Лекин бу хатоларни деб, нормал давлатлардагидек Хусусий бандлик агентликлари капиталига қўшимча талаблар қўйиш, фаолиятни ва истеъмолчиларни суғурталашга ўтиш ўрнига, бутун бозорни яксон қилиш, яна Агентлик монополиясига қайтиш, билмадим, нима деб аталади. Ғалати бу камида. Бир пайтлар 2-3 та нотариусни деб бутун бошли хусусий нотариат институти йўқ қилинган эди, ҳалигача қайта тиклай олмай ҳалакмиз. Бир пайтлар 4та махинаторни деб бутун бошли кредит уюшмалари тизими яксон этилганди. Пашшага қарши замбараклардан ўт очишни қойиллатамиз ва бунда ўз манфаатимизни ҳам унутмаймиз. @the_bakiroo