"Биз кетсак биздан ёмонроғи келади ва аҳвол янада бадтар бўлади" Ҳокимият юқори эшелонларида қолаётган, лекин ўзларини сиёсат билан ҳар доим ҳам келишмайдигандек кўрсатадиган, айни пайтда ўзининг бутун ақли ва салоҳиятини режимни мустаҳкамлашга сарф этаётганларнинг шундай оқловларини тарихда ва бугунда эшитган, ўқиган чиқарсиз. Бундай позицияни ҳар эҳтимолга қарши оқлов баҳонаси, деб ҳисоблаш ҳам мумкин. Бундай баҳоналарни ишлатгувчиларда аслида чуқур савол йўқдек кўринади, улар ўзларининг комфорт зоналарини тарк этиш ҳақида бир сония ҳам ўйлаб кўришмайди, деган шубҳалар сизни асло тарк этмайди. Уруш бошлангач, Россияда, иқтисодий блокда, айниқса Марказий банкда мана шундай морал дилеммасига учраганлар кам эмас. Уларнинг энг каттаси Марказий банк раиси Набиуллина ва унинг ундан кам ақлли бўлмаган ўринбосари Юдаева ҳақида Медуза катта материал тайёрлапти. Менга мақола сўнгида Гуриевнинг Путин Россиясини қутқараётган Набиуллина ва унинг жамоаси ҳақида билдирган қуйидаги фикрлари жуда эътиборли кўринди: "Ҳозир юз бераётган воқеаларни - бу шубҳасиз, нацистлар Германиясида технократларнинг иши билан солиштирса бўлади. Иқтисодий барқарорликка ёрдам бераётган ҳар бир иқтисод қилиб қолинган рубль, шу жумладан уруш учун ресурсларнинг мобилизациясига ва украинларни ўлдиришга хизмат қилмоқда. Ишончим комил, келажакда, Марказий банк ходимлари у ёки бу кўринишда (жиноятчи режим билан) ҳамкорлик ва унинг ишига қўшган ҳиссаси учун маҳкамага тортилишади". Дарвоқе, Ўзбекистонда тақиқда қолаётган твиттерда ўтган ҳафтада шу мавзуга оид иккита сўров ўтказгандим. Унда хусусан, "Путиндан кейин, сизнинг-ча, янги маъмуриятни кимлар шакллантиради" деган саволга сўралганларнинг 43%и "иқтисодий блок" деб жавоб берганди. "Ўзбекистон манфаатлари учун Путиндан кейинги маъмуриятга келиши мумкин бўлганлар орасида, сизнинг-ча, ким қулайроқ" деган саволга ҳам 52% сўралганлар "иқтисодий блок" деб жавоб беришган. Айтгандек, "Гитлер банкири" деб ном олган Рейхсбанк раиси, иқтисод вазири Ялмар Шахт Нюрнберг процессида оқланган кам сонли нацист чиновниклардан ҳисобланади.