24/7 режимида ишловчи кўча Истиқлол кўчасида бўлмаслиги керак Юқоридаги постни ўқиган одам асосий муаммо 24 соат ишлайдиган кўчадаги ишлар сифатсиз, қўл учида ва номига қилинганида деб ўйлашлари табиий. Айниқса Андижонлик бўлмаса. Лекин бу ерда асосий масала бошқа: 24/7 режимида ишловчи кўча Истиқлол кўчасида бўлмаслиги керак! Аслида Андижон шаҳри учун 24/7 режими учун кўпроқ мос келадиган Бобур шоҳкўчаси танланган эди. Лекин шу йил тухум қисилган вақтда стрелка Истиқлол кўчасига қараб бурилиб кетган. Бир пайтлар ва шу бузғунчиликка қадар ҳам мазкур Истиқлол кўчаси (собиқ Ленинск) Андижоннинг ўзига хос архитектурасини намоён этувчи, шаҳарнинг индивидуал қиёфасини сақлаб қолган кам сонли кўчаларидан бўлган. Бежизга 2014 йил октябрда биринчи президент Каримовга бу кўча кўз-кўз қилинмаган. 2022 йил май ойидан бошлаб сайилгоҳ типидаги, машиналар ҳаракати чекланган шу кўчада 24/7 режимидаги кўча ташкил қилиш ҳаракатлари бошланган (балки топшириқ бажарилди дея тепага рапорт ҳам берилган). Бу қарорга масалан, СЭС, тез ёрдам, ёнғинга қарши кураш, ФВВ, электр ва сув таъминоти органлари қанчага ва энг асосийси, Архитектура назорати қандай рухсат берган, мен билмайман. Андижон учун кам сонли ноёб архитектурани бозор/аттор расталари билан тўсиш, ёпиш, билмадим, нима деб аталади. Архитектура, шаҳарсозлик ва жамоат қадриятлари бир тийин бўлганлар учун, ҳа, бу норма. Буям майли. 24 соатлик кўча ташкил этилганидан бери бирон кун кўча соат кечки 8дан кейин ишламаган (суратлардан бирида иш режими вақтлари акс этган). Чунки бу ерда бунинг учун энг керакли на ресторанлар, на дўконлар, на клублар бор. 24 соатлик кўча учун ижтимоий, тижорий ва иқтисодий талаб манзили ҳам эмас бу жой. Президент ҳам урғуни айнан аввалбошдан шундай инфратузилмага эга кўчаларга қаратгани бежиз эмас. Ҳозирда бирон кун ишламаган, амалда ҳатто тикланмаган киоска ва дўконларнинг аксарияти сотувга қўйилган. Умид шуки, 24/7 кўча ташкил этиш йўлида қилинган бу хатолик бартараф этилади. Истиқлол кўчаси эса яна ўзининг аввалги ҳолига қайтарилади. https://t.me/the_bakiroo/5457