Ўзим ё болаларим билан пиёда юрмоқчи, сайр қилмоқчи бўлсам, машинага ўтириб шаҳар марказига ёки Байналминал кўчасига бораман. Назаримда шунчаки пиёда юриб сайр қилиш учун бошқа жойга боришга мажбур бўлувчи бир мен эмас. Тасаввур қилинг, уйингиздан пиёда чиқиб кўча тротуари бўйлаб ўнгга ё чапга қайрилинг, тротуарга кўндаланг қўйилган нечта машинани айланиб ўтасиз, чуқур, ямаларни сананг, тўкилган қум ё шағал ёки қурилиш материалларини четлаб ўтиш учун автомобиль ҳаракатланаётган кўчага ҳам чиқасиз, бесўнақай хавфли зиналар, оғзи ёпилмаган ёки ер сатҳидан ярим метр кўтарилган қудуқлардан сакраб ўтасиз. Чарчадингизми? Коляскада ё самокатда фарзандингизни етаклаб чиққан бўлсангиз-чи? Кундан кунга пиёда юриш камёб ва имконсиз ҳаракатга айланаяпти, сезаяпсизми?