"Ўзбекистоннинг тизимли аҳамиятга молик банклари учун биринчи даражали асосий капиталга нисбатан 2 фоиз қўшимча буфер ўрнатишни тақозо этади" Марказий банк Молиявий барқарорлик шарҳини тақдим этмоқда. Шарҳ кенг ва тор профилли банк-молия мутахассислари учун муҳим бўлган масалаларга риск ва барқарорлик нуқтаи назаридан регулятор позицияларини ўз ичига олган. Эътиборлиси, регулятор тизимли аҳамиятга молик банклар учун буфер жорий қилишда банк тизими ҳажмининг ЯИМга нисбати кўрсаткичи ҳамда банк секторининг концентрациялашган даражасини инобатга олиш бўйича Базель қўмитаси тавсияларига алоҳида тўхталган. Банк секторидаги концентрация ва рақобат даражасини кўрсатувчи Херфиндаль-Хиршман индекси (НН) Ўзбекистон банк тизимида 1096 ни ташкил этган. Яъни, Ўзбекистон банк тизими ўрта даражада концентрациялашган банк хизматлари бозорига эга. Айни вақтда HH индекси Ўзбекистоннинг HH индексидан паст бўлган мамлакатларда ҳам тизимли аҳамиятга молик банклар учун буфер жорий қилинган. Бошқача айтганда, Ўзбекистонда тизимли аҳамиятга молик банклар учун қўшимча капитал буфери қўллаш зарурати юзага келмоқда. Амалдаги қонунчиликка кўра, банк тизимининг барқарорлиги қайси банкнинг фаолиятига боғлиқ бўлса, ўша банк тизимли аҳамиятга молик деб ҳисобланади.