Кредит пуфаклари оқибатларини олдини олиш учун контрциклик капитал буфери талаблари киритилади Марказий банк Банклар капиталининг монандлигига қўйиладиган талаблар тўғрисидаги низомни янги таҳрирда тасдиқлаган. Базель III талабларига максимал даражада яқинлаштирилган янги мезон ва кучайтирилган қоидалар 2026 йил 1 январдан кучга киради. Хусусан, янги низом талаблари Марказий банк томонидан Конциклик капитал буферини жорий этилишини назарда тутади. Контрциклик буфер яратиш, содда тилда айтганда, бозор ва кредит сегментлари кескин ўсаётган ва тўқчилик даврида қўшимча капитал жамғариш, бозорнинг ортга келиши ва чўкиш даврида жамғарилган қўшимча капитални қоплашдан иборат макропруденциал чораларни ўз ичига олади. Низомга кўра, Марказий банк Контрциклик капитал буферини Кредит тафовути, макроиқтисодий ва банк тизими кўрсаткичларидан келиб чиқиб ўрнатади. Контрциклик капитал буфери коэффициенти таваккалчиликни ҳисобга олган ҳолдаги активларнинг 2,5 фоизигача белгиланади. Контрциклик капитал буфери коэффициенти Марказий банк бошқаруви томонидан ҳар олти ойда кўриб чиқилади. Контрциклик капитал буфери даражасини ўзгартириш юзасидан қарор қабул қилинган тақдирда, унинг даражаси 0,25 фоиз банддан ошмаган миқдорда оширилиши ёки камайтирилиши мумкин.