ХВФнинг Туркия учун тавсиялари ўтган эпохада Ўзбекистон учун доимий бериб келинган тавсияларни эслатади Халқаро валюта фонди Миссияси Туркияга навбатдаги ташриф якунлари бўйича хулоса ва тавсияларини берди. ХВФ Туркиядаги муаммоларнинг ечими бўйича фоизларни узоқ муддатли истиқболда ошириб боришни, шу билан бирга Марказий банк мустақиллигини кенгайтиришни тавсия этган. Айнан шу ҳаракатларгина уч хоналига қараб яқинлашаётган ифляцияни тўхтата олиши ва захираларни тикланишига асослар яратиши қайд этилган. Туркияда монетар мантиққа зид равишда ставкаларни пасайтириш давом этмоқда, Марказий банк қарорлари аввал ҳукуматда тайёрланиб, кейин эълон қилинаётгани практикага айланиб бўлган. Миссиянинг тавсиялари ва Туркиянинг амалдаги сиёсати нолинчи йиллардаги Ўзбекистонни эслатади. Чунки ХВФ қандай тавсия бермасин, хулосалар мундарижаси қандай кўринишга эга бўлмасин, Ўзбекистон расмийлари амалда ғирт тескари қарорларни қабул қилишда давом этишарди.