Ҳалқа йўли бўйлаб юрилса, яна юзлаб "Минерва сити" кейсларини топса бўлади Қишлоқ хўжалиги ерларининг шафқатсизларча талон-тарожи яккам-дуккам ҳодисалар эмас. Бу энг пастдан энг тепа занжирларгача ўзаро бир-бирини қувватлайдиган, ер сотишдан тушаётган миллиардлаб пулларни ўзаро бўлишадиган ва ҳуқуқ-тартибот органларининг ҳар қандай саволларини хаспўшлаб, йўққа чиқарадиган бутун бошли тизимга айланган. Унумдор қишлоқ хўжалиги ерлари ўрнида қурилиши керак бўлган фақат Минерва сити эмас. Ҳалқа йўли бўйлаб юрсангиз, Зангиота, Тошкент, Қибрай, Юқори Чирчиқ, Қуйи Чирчиқ туманлари билан туташ бўлган, яқин 5-6 йил аввал боғлар, узумзорлар, сабзавот плантациялари бўлган минглаб гектар қишлоқ хўжалиги фойдаланувидаги ерларда пайдо бўлган заправкалар, дўконлар, домлар, коттедж ситиларни кўрасиз. Ўрганилса қонун талаблари бузилмаган ер ажратиш қарорини топишнинг ўзи қийин. Нафақат Тошкент атрофида шундай, Наманган, Самарқанд, Андижон, Фарғона каби шаҳарлар ҳам минглаб гектар қишлоқ хўжалиги ерларини ютиб юбормоқда. Йўқотишлар кўламини тасаввур қилиш учун умуммиллий тафтиш ўтказиш керак бўлади. Бу тафтишдан янги Ўзбекистонни тамсил этувчи биронта ҳоким тирик чиқармикан? Ер қонунчилигига ўтган йили киритилган ўзгартиришлар бу жараённи тўхтатиб қололгани йўқ. Чунки онгли равишда қолдирилган лазейкалар тўхтов билмай ишлаб турипти.