Бизнес марказ ва кўп қаватли уйларга айланган гузарлар ҳақида Беихтиёр шундай қилиш мумкинмиди, дейишингиз мумкин. Кеча Курбанов ва Давлетов парковкадан яримсупермаркетга, кейин бизнес марказга айланган, гузардан кўп қаватли уйларга дўнган лойиҳалар ҳақида ёзғиришди. Шахсан ўзим Чилонзор 9- кварталда бир қаватли гузар ва участковой учун ажратилган ер майдонида, бузилган гаражлар ўрнида икки қаватли боғча учун ажратилган майдонларда бўй чўзган кўп қаватли уйлар қурилганига гувоҳман. Пойтахтда бирон бир квартал ё маҳалла йўқки, шундай бузғунчиликка дуч келмаган бўлсин. Бу қанақасига, шундай қилиш мумкинмиди дейишингиз мумкин. Ҳамма гап шундаки, формал равишда мана бу эксперимент доирасида Тошкент шаҳрида 2018 йил октябрдан 2021 йил августгача ер ажратиш ва бу билан боғлиқ исталган олди-бердига бориш мумкин бўлган. Ҳозирги кун кўзи билан қараганда бу ҳужжатнинг Тошкент учун қанчалар зиён келтиргани ва коррупцион кўлам ҳажмини ўзингизга тасаввур эта оласизми? Мен тасаввур эта олмайман. Балки бу миллиардлар билан, балки триллионлар билан ўлчанар. Исталган ҳудудда исталган формулировка билан ер ажратиб олиш, уни исталган вақтда мазмуни ва мақсадини ўзгартириш мумкин бўлган. Ҳозир масалан, 2018 йилда бир қаватли гузар учун ажратилган ерда тўққиз қаватли бизнес марказ пайдо бўлган бўлса, аввалбошдаги қарорни топиш керак бўлади, агар буни орқа сана билан қайтадан ясаб қўйишмаган бўлса (e-qaror тизими йўлга қўйилгунича ҳокимлар билган номаъқулини ейишган). Фирмаларга ажратилган ер майдонлари бўйича фирмаларнинг таъсисчиларини ўзгартириш орқали ер сотишларнинг, қўлдан қўлга ўтишларнинг эса саноғи йўқ. Лекин бу дегани кўз юмиш, ўтган иш ўтди, қозонлар ёпилди дегани эмас. Менинг ишончим комил, бир кун келиб, 2018 йил октябрдан 2021 йил августга қадар ер ажратиш билан ва қурилиш ишларига оид ҳар бир қарор лупа билан қайтадан текшириб чиқилади. Хўш, шартли гузар ўрнига шартли бизнес марказлар қуриб олганлар бўйича нима қилиш керак? Тортиб олиш керакми? Йўқ. Биз большевик эмасмиз-ку. Бузвориш керакми? Йўқ, биз оккупант босқинчи ҳам эмасмиз-ку. Ҳаммаси қонун доирасида юз бериши зарур. Албатта, аввало бирламчи ҳужжатларга, инвестиция талаблари ва мажбуриятларига қайтиш керак (агар сохталаштирилмаган бўлса, сохталаштирилган бўлса - бу жиноий иш). Агар инвесторнинг хатоси бўлса , у катта жарима тўлаши зарур. Агар қайсидир амалдор шартли гузарни шартли бизнес-марказга айлантиришга коррупцион йўл билан кўмак берган бўлса. биринчи навбатда амалдор жазоланиши зарур. Кейин инвестор. Йиғилган жарималар энг аввало шикаст етган пойтахт инфратузилмасини тиклашга йўналтирилиши зарур. Кейин ижтимоий неъматлар (жамоат транспорти, жамоат майдонлари, пиёдалар инфратузилмаси) яратиш учун. Бу нима учун керак? Жазо муқаррарлигини қайд этиш учун керак. Истиқболда бу каби бузғунчиликлар қайта такрорланмаслиги учун керак.