Ҳуқуқий экспериментлардан қўрқаман Чунки ҳуқуқий бўлмаган маконда ҳуқуқий экспериментлар Фуқароларнинг ҳақлари бузилишига, зарарли ва бошвоқсиз бюрократиянинг кенгайишига ва албатта коррупцияни авж олишига етаклайди. Эслатиб ўтаман, бугунги экологияси, инфратузилмаси ва истиқболи тобора ёмонлашиб бораетган Тошкент 2018 йилда Артикходжаевнинг манфаатлари доирасида бошланган ҳуқуқий экспериментнинг натижаси ҳисобланади. Ўшанда ўзи бусиз ҳам ваколатлари чекланмаган Тошкент ҳокимига ер ажратишдан (сотишдан) тортиб, мулк тақсимлашгача, бюджетни ўзлаштиришдан тортиб, муҳим қарор қабул қилувчиларни Республикадан сўрамай тайинлашгача бўлган мисли кўрилмаган ваколатлар тақдим этилганди. Ҳуқуқий эксперимент тепадан (олий ҳокимият) ҳам пастдан (қора халқ) ҳам ҳисобдорликни ҳис этмаслик, тийиб туриш механизмларининг барбод этилишига ва бугунги кўриб турганингиз ёмон Тошкентга олиб келди. Артикходжаевнинг князларга хос ваколатлари унинг ўрнига келган Умрзаковга ҳам тинчлик бермаган кўринади. Ҳеч ким сайламаган Умрзаков ҳам камида 3,5 йил ҳуқуқий экспериментдан баҳраманд бўлмоқчи. 2027 йилгача амал қиладиган ҳуқуқий эксперимент инвестиция лойиҳаларини амалга ошириш ва шаҳар инфратузилмасини яхшилаш тартиби деб аталади. Ҳужжат матни ҳали тўлиқ очиқланмаган. Инфратузилма деганда пул ўзлаштириладиган кўприкларни тушунадиган, лойиҳа деганда бюджет ва ташқи қарзларни эмадиган каррасига шиширилган GTL чизадиган ўзбек чиновникларидан яхшилик кутиш қийин. Дарвоқе, Умрзаков ҳам худди Артикходжаев каби тадбиркорлар билан кўприк орқали робита ўрнатмоқчи. Унга кўра яна битта давлат корхонаси “Тошкент Инвест компанияси” акциядорлик жамияти ташкил этилади.