Халққа Контейнерлар эмас, нормал Поликлиникалар керак! Контейнерлардан ҳукумат аъзоларининг ўзлари фойдалансин! Шаҳарда поликлиникалар етишмайди. Вилоят ва туман марказларида ҳам шу аҳвол. Аҳоли ўсишига нисбатан, айниқса охирги 6 йилдаги урбанизация даражасига нисбатан поликлиника хизматлари билан қамраб олиш ортда қолаётгани ҳам бор гап. Графиги бўйича 2 соат ё 4 соат ишлайдиган малакали врачга кўриниш учун тонг соат 6да ёки 7да бориб навбат олиш керак. Буни аёллар, айниқса болали аёллар ҳар куни бўлмасаям, ҳар ҳафта, ҳар ой ўзининг танасида жуда яхши ҳис қилишади. Чунки поликлиникалар қуввати етишмайди. Малакали шифокорлар давлат поликлиникаларида энг минимум ставкада ишлайди. Қолган вақт улар хусусий шифохоналарда. Чунки давлат поликлиникалари малакали шифокорларнинг минимал ҳаёт тарзида яшаш харажатларини қопламайди. Давлат мактабларида Таълим билан қоплаш қандай абгор даражага етган бўлса, бирламчи тиббиёт -поликлиникалар билан қоплашда ҳам аҳвол шу. Шунинг учун янги поликлиникалар керак. Лекин бу йўлда "подмена" билан шуғулланмаслик зарур. Контейнер бу поликлиника эмас. Агар тажриба ўтказмоқчи бўлсангиз, марҳамат ҳукумат шифохонаси ва поликлиникаларини халққа қайтаринг-да, ўзларингиз — вазирлар, ҳокимлар шу контейнерга қатнанг! Гап бу ишнинг, контейнерларнинг "дезинфекция туннели" ё "контейнер шифохонаси" каби миллиардлаб пул ишлаш ва давлат маблағларини ўзлаштириш учун ўйлаб топилган инструментларнинг давоми эканидагина эмас, уларнинг аҳоли учун мутлақо иқтисодий самарасизлигида ва бефойдалигида. 170та контейнерни жиҳозлаш, ўрнатиш қанчага тушади? Битта контейнер нархи қанчагача шиширилаяпти? Ойлик эксплуатацияси-чи? Хуп, шу харажатларнинг жамини ҳисобласак, ўрнига муқобил ҳисоб-китоб қилсак, нечта нормал поликлиника қуриш мумкин? Ўзи Соғлиқни сақлаш вазирлигида Шодмонов и ко'дан кейин иқтисодий мазмун ва самарадорлик ўлчови қайта тикландими? Нимадир масала ўйлаб топилганида Битта пациентни тиббий хизмат билан қамраб олиниши таннархи ва самарадорлиги ҳисоби қилинадими? Ҳурматли Мусаев айнан иқтисодий мушоҳада кишиси бўлгани учун соҳага ўтказилмаганмиди? Агар тиббиёт самарадорлиги уйма-уй юриб хизмат кўрсатиш ва ҳар бир маҳаллада контейнер қуриш билан боғлиқ бўлса, нега нормал дунёда пациентлар ва шифокорларни бир жойга оптимал тарзда йиғиш принципи устида қурилган поликлиника институти бекор бўлиб кетмаяпти?