Жарликлар кўмиб юборилади ва кейин сотилади. Аввалбошдан мақсад ўзи шу бўлган кўринади Ўтган йили Шайхонтоҳурга ташриф вақтида тумандан ўтган жарликларни кўмиб юбориш ва бунинг учун 450 млрд.сўм ажратилиши ҳақида гап кетганди. Ўшанда жарликларни ёпиб, унинг ўрнига дарахт экиш ва йўл очиш бўйича топшириғи янграганди. Орадан 1 йил ўтиб, Тошкент шаҳар ҳокими қабул қилинаётган қарорга кўра, кўмиб юбориладиган коллекторларини ёпиқ ҳолатга келтиришдан шаклланган бўш ер майдонларини лотларга ажратган ҳолда, тасдиқланган лойиҳаларни электрон-онлайн-аукцион савдоларига чиқариш таклиф этилмоқда. Кўмилган жарликлар устида аввалдан тасдиқланиб олинган “Daryo Bo‘yi Business City” лойиҳаси асосида савдо-маиший ва хизмат кўрсатиш объектларини, турар-жойлар ва нотурар объектларини жойлаштириш мўлжалланмоқда. Жарликларни кўмиш хато иш эканини, бу жарликлар инсон фаолияти натижасида эмас, табиий оқим туфайли минг йиллар давомида шакллангани, таклифни тупроқшунослар, ирригаторлар, геологлар ва экологлар ўрганиб, мустақил тарзда фикр бериши кераклигини аввал ҳам таъкидлаган эдик. Ўтган даврда мутахассислар жарликларни кўмиш оқибатларини ўргандиларми ё йўқ, бунинг оқибатлари тўғри баҳоландими, биз билмаймиз. Ерни эгаллаш ва тезроқ сотиш манфаати яна устунлик қилган кўринади.