Ошкора қотиллик қиссаси: "Рак корпуси"ни бузиб юборишга хулоса берган МЧЖнинг лицензияси бўлмаган Ҳарқалай, тегишли суриштирувлар шундай фикр билдиришга асос бўла олади. Ва жуда катта катта эҳтимол, хулоса берган МЧЖда ҳеч қандай лицензия йўқлигини Қурилиш вазирлиги ҳам, Соғлиқни сақлаш вазирлиги ҳам жуда яхши билган! Лекин буни Бош Прокуратура аниқлаши керак. Ҳаммаси нимадан бошланди? Эсингизда бўлса, "Рак корпуси" бузиб юборилгани бўйича жамоатчиликнинг кескин норозиликларидан кейин Соғлиқни сақлаш вазирлиги баёнот бериб, бузиб юборилган "Рак корпуси" бўйича “Sentr Ekspertiza Kontrolnogo Obmera 110” МЧЖнинг техник ҳисоботи олингани айтилди. Объектларнинг яроқли ёки яроқсизлигини текшириб, хулоса бериш учун ССВга кўра, "Sentr Ekspertiza Kontrolnogo Obmera 110” МЧЖга шундай лицензия Қурилиш вазирлиги томонидан гўёки 2021 йил 19 декабрда берилган. Шу санани яхшилаб эслаб қолинг. Кеча ва ўтган куни "Sentr Ekspertiza Kontrolnogo Obmera 110” МЧЖ реквизитларини топиш жуда қийин бўлди. Чунки расман бу компания номида 110 рақами ёпиштириб, мана бунақа ёзилган экан: SENTR EKSPERTIZA KONTROLNOGO OBMERA110 Демак, "SENTR EKSPERTIZA KONTROLNOGO OBMERA110" МЧЖ 2021 йил 13 декабрда рўйхатдан ўтган. Бу сананиям яхшилаб эслаб қолинг. Таъсис этилган вақтда ягона таъсисчи . ABDULLAYEV ABDUJAMIL ABDUSATTAROVICH бўлган, ижрочи раҳбар ҳам ўзи. Яқинда унинг ёнига яна бир таъсисчи NISHONOV RUSTAM IBODULLAYEVICH қўшилган. Демак, агар ССВнинг баёнотига ишонадиган бўлсак, "SENTR EKSPERTIZA KONTROLNOGO OBMERA110" МЧЖ рўйхатдан ўтгандан кейин 6 кун ўтиб, Қурилиш вазирлигининг лизенциясига эга бўлган. Амалдаги қоидаларга кўра, тегишли лицензия 7 иш куни давомида ҳужжатлар кўриб чиқиб, кейин берилади. Бу дегани, МЧЖ ташкил этилган куниёқ лицензия учун барча ҳужжатларни (улар кам эмас) топширган тақдирда ҳам фақат 2021 йил 21 декабрь кунига келиб лицензияга эга чиқиши мумкин эди. Шу соҳадаги мутахассисларга кўра, лицензия олиш осон эмас, бунга ҳужжатларни қайта ва қайта топшириш ва камида бир ой вақт кетади. Шундаям яхши гумон қилишда давом этдим, балки тепада таниши бордир, балки йўлини топгандир, шунақаси ҳам бўладику. Ва кейинги босқичга ўтдим. Ўзи SENTR EKSPERTIZA KONTROLNOGO OBMERA110 МЧЖнинг лицензияси бормикан? Бўлганми ўзи? Адлия вазирлигига ва шахсан собиқ вазир Русланбек Давлетовга катта раҳмат. Ўзбекистонда берилган ва мавжуд барча лицензияларни битта реестрга йиққан, жамлаган. Бутун лицензиялаш жараёни кафтдек кўриниб туради. Агар масалан, SENTR EKSPERTIZA KONTROLNOGO OBMERA110 МЧЖнинг лицензияси бўлса, мана бу манзил реестрида унинг СТИРини (309111574) киритамиз ва лицензия чиқиб келиши керак. Минг афсуски, SENTR EKSPERTIZA KONTROLNOGO OBMERA110 МЧЖ лицензияси реестрда йўқ. Бўлмаган ҳам. Мен ҳар эҳтимолга қарши турли соҳаларда ишлайдиган юзлаб лицензия эгалари маълумотларини текшириб чиқдим. Улар бор, лицензия маълумотлари ҳаммаси мос келади. Лекин "Рак корпуси"ни яроқли ёки яроқсизлигини текшириб, хулоса берган SENTR EKSPERTIZA KONTROLNOGO OBMERA110 МЧЖнинг лицензияси реестрда йўқ. Бу жараёнга МЧЖни жалб қилишда ССВ ё Қурилиш вазирлиги МЧЖ ҳақидаги маълумотларни, унинг лицензияси мавжудлигини ўрганиб кўрмаган бўлишини кўз олдимга келтира олмайман. Шунинг учун уларнинг бехабарлигини истисно этишим жудаям қийин бўлмоқда. Мана шунақа ошкора қотиллик қиссаси. Ҳамма билган, била туриб кўз юмган ошкора қотиллик қиссаси. @the_bakiroo