Фаворитизм амалда: Кеча севимли, бугун эса душман Ўрта асрларнинг феодал бошқаруви яратган ҳодисалардан бўлган фаворитизм Янги Ўзбекистонда қарор қабул қилувчилар ва уларга чатишиб кетган "бизнес" муносабатларида яққол кўринади. Балки кун келиб Ўзбек тилининг изоҳли луғатида "Фаворитизм" сўзининг маъносини тушунтиришда айнан “Intermed Innovation” МЧЖ мисоли келтирилар. Пандемия ва постпандемия давридаги осмондан ёғилган триллионлар ўзбек медицинаси менежерларига мисли кўрилмаган тажриба эшикларини очди. Вазир Ҳожибоевдан вазир Мусаевгача бўлган даврда “Intermed Innovation” МЧЖга очиқ ва ёпиқ қарорлар билан тақдим этилган тиббиёт муассасалари ва лабораторияларни санаб чарчаган эдик. Ўша вақтда қўйилган саволларнинг ҳеч бирига на Ҳожибоев, на Мусаев жавоб берган. Қарангки, яқин 9 ой нарисида севимли бўлган “Intermed Innovation” МЧЖ нинг лицензияси тортиб олиб қўйилипти. Эмишки, “Intermed Innovation” МЧЖ Чирчиқ шаҳрида жойлашган 3-сон оилавий поликлиника биносида лицензиясиз тиббий фаолият олиб борган. Орадан бир йил ўтиб, “Intermed Innovation” МЧЖ фойдасига бирон гап ёзаман, деб ўйламаган эдим. Ахир нафақат Чирчиқдаги 3-сон поликлиника, Тошкент шаҳри ва Тошкент вилоятидаги барча поликлиникалар вазир Мусаевнинг 2022 йил 7 январдаги буйруғига кўра “Intermed Innovation” МЧЖга топширилганини кимдир эсладими? Кимдир суриштирувга, терговга, судга Мусаевни чақирдими? Мантиқ қани? Нима ўзгардики ўтган даврда Севимли бўлган “Intermed Innovation” МЧЖ пуфа сассиққа чиқди? А, дарвоқе, вазир ўзгардику. Ҳа, хўп вазир ўзгарипти. Эски вазир қабул қилган ноқонуний қарорларни бекор қилаётган бўлса, яхши. Лекин бунда жазони бизнесга эмас, ўша ноқонуний қарорларни қабул қилганларга қаратиш керакмасми? Бизнес учун монопол ҳуқуқлардан маҳрум қилинишининг ўзи жазо-ку, лицензиясини тортволиб хонавайрон қилиш нимаси? Ишлайверсин ана, фақат имтиёзли ҳуқуқларсиз, очиқ бозорда, рақобатли шартларда. Нимага сизларнинг қарорларингиз доим у қутбдан бу қутбгача телба ўзгаришларда бўлади? Нега ўрталиқ йўқ? Нима учун бизнес ё сизларнинг севимли дўстингиз ёки ашаддий душманингиз бўлиши керак? Ва асосий савол: нега қилғилиқнинг бошида турган сизларга жазо йўқ?