ҚҚС тушди, UzAuto Motors нархларни туширмади. Қайтанга янги комплектация баҳонасида янада қимматлашади Бугундан бошлаб, қўшилган қиймат солиғининг 12 фоизлик ставкаси амал қила бошлади. Чакана савдо ва пуллик хизмат нуқталарида янги ставка ҳисобида савдо чеклари берилиши керак. Байрамдан олдин, контрактация қилиш имкони қолган ягона автомобиль Chevrolet Onix нархларини пасайтириш мумкинлиги ҳақида хабарлар пайдо бўлганди. Лекин бугун 1 январдан бошлаб монополист UzAuto Motors илова ва бот орқали таклиф этаётган автомобиллар нархини ўзгартиришсиз қолдирган. Албатта биз буни кутгандик. ҚҚС пасайиши монополлашган бозорларда фақат монополистларнинг фойдасига ишлайди. Нархларнинг пасайишига-ку умид йўқлиги аниқ бўлди. Лекин нархларнинг ошиши давом этадими? Албатта, давом этади. Фақат бу янги комплектациялар ва позициялар баҳонасида рўй беради. Қимматлаштирилган комплектациялар чиқарилади, арзон комплектациялар эса йўқотилади. Илгари бу усул Spark ва Nexia-3 мисолида кўп қўлланилган. Демак, монополист 9 январдан бошлаб Chevrolet Onix'нинг Premier комплектациялари бўйича контрактация очади. Нархлар эса анчагина қимматроқ бўлади. Chevrolet Onix 4LT LTZ 189,9 млн.сўмдан бошланган бўлса, Chevrolet Onix Premier нархи 207 млн.сўмдан 214,7 млн.сўмгачани ташкил этади. 15 дискни 16ликка алмаштириш ва майда чуйда электроника нархни 25 млн.сўмга ёки 13%га оширадими? Бу қанақаси, дейишингиз мумкин. Лекин фиғонларингиз ҳеч қаерга етиб бормайди. Чунки айнан қимматлаштирилган Chevrolet Onix'га сунъий талаб ҳосил қилиш учун Cobalt ва Lacetti контрактациялари тўхтатилган.