Иқтисодий популизмнинг кейинги дозаси қандай бўлади? Вазият ва муносабат ўзгармаса, қайта тикланадиган манбалар учун ажратилаётган кредитларнинг муаммолилик даражаси коммунал соҳага (УЖМШ ва бошқарув компанияларига) ва оилавий тадбиркорлик учун йўналтирилаётган имтиёзли кредитлардан катта фарқ қилмайди. Биз келаси йилдаёқ бугун урра-урра қилиб каррасига қимматлаштирилган қуёш панеллари учун бизнес ва аҳолига ажратилаётган кредитлар бўйича икки хонали NPL кўрсаткичларига чиқамиз. Чуқур ўрганилмаган, техник иқтисодий тарафдан асосланмаган, юкламаси истеъмолчиларга тушадиган асосий параметрларлари кўздан панада қолаётган йирик қуёш ва шамол электр станциялари бўйича-ку гапирмасаям бўлади. Чунки қарор қабул қилиш, молиялаштириш, харидлар ва таъминотни расмийлаштириш жараёни тўлиқ давлат ва ҳокимият органлари тарафидан маъмурийлашмоқда. Рискларни баҳолаш ва бозор ўлчовларини ҳисобга олиш бутунлай четда қолган. Шу маънода, Қайта тикланадиган (энергия тежовчи) энергия манбаларини, жумладан йирик қуёш ва шамол электр станциялари, қуёш панеллари ҳамда кичик фотоэлектр станцияларини ишга тушириш учун жисмоний ва юридик шахсларга 2023 йилнинг 1 декабрига қадар ажратилган кредитлар бўйича риск даражасини ноллаштириш таклифини ғирт иқтисодий популизм деб атаса бўлади. Марказий банк ҳукуматга ёқиш учун бундай таклифлар бериши эмас, ҳукуматни бундай ҳаракатлардан тийиши керак аслида. Қолаверса, юқори риск профилига эга бўлган активлар риск даражасини ноллаштириш Базель қўмитасининг Базель-III стандартларига ҳам мутлақо зиддир. Қизиқ, шу каби иқтисодий популизмдан кейинги қадамлар қандай бўларкин? Ахир дозанинг камайиб қолишини дозага ўтириб қолаётганлар бундан кейин тушунадими? Тушунадиган ҳолда бўладими улар?