Йилига 30 минг дона ва нархи 3000 долларлик электромобиль ваъдаси билан бошланган ёлғон: маҳаллийлаштириш доим миллий чайқовчилик билан якун топади Ўтган куни шу пайтгача автомобиллар билан олиб сотарлик қилиб келган миллий монопол чайқовчи Ўзавто бундан буён электромобиллар билан чайқовчилик фаолиятини расман бошлаётганини эълон қилди. Шиширилган нархлари қарийб 60 минг долларгача етадиган таклифлар бозор ёки кенг истеъмолчилар учун эмас. Аввал ҳам ёзганимиздек, давлатни ва бюджетни эмиш учун. Чунки шу йилнинг ўзида кети нозик ўзбек чиновниклари ихтиёрига камида 800 та электромобиль ва гибрид етказиб берилиши керак. Электромобиллар билан боғлиқ кейс Ўзбекистонда ҳар қандай маҳаллийлаштириш, бу маиший техника ишлаб чиқаришми, автомобилми, болалар таглигими ё металл прокатми якунда монопол чайқовчилик ҳуқуқини эгаллаш билан якун топишини яна бир бор тасдиқламоқда. Келинг шу ўринда электромобиллар ишлаб чиқариш ва маҳаллийлаштириш афсонаси қандай тўқилгани тарихига қисқа назар ташлаймиз: 2018 йил. Бухоро. Хитойнинг Henan Suda компанияси электромобиллар ишлаб чиқаришни бошлаши мумкин. Лойиҳа 64 млн.доллар. Ўшанда электромобиллар Нексия ва Спарк нархида бўлиши ҳам айтилганди. 2018 йил. Андижон. Жанубий Корея компанияси Асакада электрокарлар ишлаб чиқаришни йўлга қўймоқчи. Қиймати 2 млн.доллар. 2019 йил. Қўқон. Шаффоф омадли саноат ва Хитойнинг Silk Road Company компанияси билан ҳамкорликда амалга оширадиган лойиҳанинг умумий қиймати 30 миллион АҚШ доллари. Электромобиллар нархи 3 минг доллар атрофида бўлади 2021 йил. Яна Бухоро. «Ideal Lift» МЧЖ ва Жанубий Кореянинг Songuo Mobility Innovation CO, LTD. компанияси билан ҳамкорликда вилоятда электромобилларни ишлаб чиқариш режалаштирилмоқда. Лойиҳа қиймати 1,21 мрд.доллар. Йиллик қуввати 30 минг дона электромобиль. 2021 йил. Фарғона. Хитойнинг «Great Wall Ceramic Industries» компанияси билан 2022 йилда якунланадиган лойиҳа натижасида 350 тадан ортиқ янги иш ўрни яратилади. Тўла қуввати билан ишга тушгач, корхонада йилигм 10 минг электромобиль ишлаб чиқарилиши мумкин. Саналганлар фақат ташрифлар давомида кўз-кўз қилинган лойиҳалар. Ўнлаб, юзлаб тўқилган ва ясама лойиҳалар сингари булар ҳам амалга ошмаган. Биронта ўзбек электромобили ишлаб чиқарилмаган. Лекин электромобиллар импорти тобора бир қўлли бўлиб, унинг савдоси бир қўлга жамланмоқда. Чунки аввалбошданоқ асл режа шундай бўлган. Маҳаллийлаштириш ниқоби остидаги чайқовчилик. Синалган усул.