Ҳокимлар сотиб юборган мактаб стадионлари, бинолари ва ерлари қайтарилдими? Тубга қараб инаётган давлат мактаблари инфратузилмаси ҳақида сўз очилганида ўтган йил ноябрда энг юқори даражада ўтказилган йиғилишда мактабларга тегишли ер участкалари ва биноларни сотиб юборилганлиги ҳолатлари кўтарилганлигини эсламаслик мумкин эмас. Ўша йиғилишда 198та мактаб билан боғлиқ мактаб стадионлари, бинолари ва бошқа ер участкалари сотиб юборилгани аниқлангани қайд этилган эди. Бу аниқлангани, босди босди қилиб, масаласи ёпиб юборилган қанча, худога аён. Мактаб ҳудудларининг сотиб юборилиш рекорди Ўзбекистон қонунлари амал қилмайдиган Андижон вилоятига тегишли экани ҳам айтилган эди. Ҳамиша сувдан қуруқ чиқадиган шоввозлар 61та мактабнинг ё ерини, ё стадионини ё мулкини сотиб юборишган. Ўша йиғилишда Бош прокуратурага ушбу ҳолатларни назоратга олиш, қонуний чоралар кўриш ва ерларни қайтариб олиш вазифаси қўйилган эди. Шахсан мен янги Ўзбекистонда ўғриларни, айниқса улар ҳокимларга алоқадорликда бўлса жазоланишига ишонмайман. Лекин мактаблар мулки қайтарилиши керак. Инфратузилмага етказилган зарарлар қуртдек, охирги тийинигача ундирилиши лозим. Эсдан чиқиб қолмаслиги ва эслатиш учун шу ерга ёзиб қўйдим.