Турк лирасининг истиқболига нисбатан турли прогнозлар очиқланмоқда Инвесторлар, банклар ва спекулянтлар турк лираси ўзини қандай тутиши бўйича баҳслашишда давом этишмоқда. Биринчи тоифа лира узлуксиз қадрсизланишда давом этади, деб ҳисобламоқда. Масалан, Goldman Sachs ўзининг янгиланган ва янада ёмонлашган прогнозларида лира курсининг 32%га пасайишини кутмоқда. Демак, Goldman Sachs таҳлилчиларига кўра, бир доллар 3 ойдан кейин 23 лирани, 6 ойдан кейин 25 лирани ва 12 ойдан кейин 28 лирани ташкил этиши мумкин. Бунга сабаб ўлароқ захираларнинг тугаб битгани ва фоиз сиёсати ўзгармай қолиши келтирилган. Иккинчи тоифа лиранинг бир муддат қулаши ва кейин тикланишини назарда тутмоқда. Масалан, Societe Generale аналитиклари ўз мижозларига USD/TRY жуфтлиги бўйича қисқа позицияларни очишни тавсия этган. Тавсияларга кўра, курс яқин уч ойда 23га етиши мумкин, кейин орқага қайтиш бошланади. Бунда Туркия Марказий банки ўзининг навбатдаги йиғилишида асосий ставкани 15%гача кўтариши, кейинги йиғилишларда эса 5 фоиз бандидан ошириб бориши мумкинлигига ишора қилинган. Дарвоқе, Туркия Марказий банкининг навбатдаги йиғилиши 22 июнь куни бўлиб ўтади. Унгача жиддий ўзгаришлар бўлишини кутиш қийин.