Ўзбекистон электр энергиясини ўртача 273 сўмдан импорт қилмоқда, экспорт 469 сўмдан Энергетика вазирлиги 2023 йилнинг 5 ойи давомида ишлаб чиқарилган, импорт ва экспорт қилинган ҳамда истеъмолга йўналтирилган электр энергияси тўғрисидаги маълумотлар билан бўлишмоқда. Яна бир очиқлама май ойида электр генерацияси бирдан кўпайгани ҳақидаги саволга қисман жавоб беради, лекин статагентлик маълумотларини рад этади. Демак, Энергетика вазирлигига кўра, май ойида Статагентлик ахборотида қайд этилганидек, 7,3 млрд.кВт.соат эмас, 5,8 млрд.кВт.соат электр энергияси ишлаб чиқарилган. Катта эҳтимол, Статагентлик январь-апрель ойларида электр энергияси ишлаб чиқариш маълумотларини кўпайтириш томон ўзгартирган ва кўпайтирилган фарқни май ойига қўшиб юборган. Айни вақтда Энергетика вазирлиги электр энергияси ишлаб чиқариш кўпайиши манбаларини батафсил очиқламаган. Яна бир қизиқ маълумот электр энергияси экспорти ва импорти билан боғлиқ. Ўтган 5 ойда Ўзбекистон 59,4 млн.долларлик 2,5 млрд.кВт.соат электр энергияси импорт қилган, 44,9 млн.долларлик 1.1 млрд.кВт.соат электр энергияси экспорт қилинган. Бундан Ўзбекистон 1 кВт.соат электр энергиясини четдан 2,38 центдан ёки 273 сўмдан сотиб олаётгани, четга эса 4,08 цент ёки 469 сўмдан сотаётгани маълум бўлади. Мазкур ҳисобга солиқлар, транспортировка нархлари, йўқотишлар кирмайди.